विराटनगर,जेठ १ः बार्षिक रुपमा विद्यार्थीहरुलाई छात्रवृत्ति प्रदान गर्दै आईरहेको वीरप्रसाद कृष्णादेवी स्मृती समाजले यो बर्ष पनि दुई जना विद्यार्थीलाई छात्रवृत्ति रकम प्रदान गरेको छ ।
स्मृती समाजले आज विराटनगर–१७ स्थित आफ्नो भवनमा एक कार्यक्रमको आयोजना गरि दुई जना छात्रालाई छात्रवृत्ति स्वरुप जनही रु.७५००।–प्रदान गरेको हो ।
छात्रवृत्ति पाउनेमा महेन्द्र मोरङ आर्दश बहुमुखि क्याम्पसमा अध्ययनरत मानवीकी तर्फकी ज्योति चौधरी र ब्यबस्थापन तर्फकी नम्रता मास्के रहेका छन् ।
छोरीलाई शिक्षित बनाउने अभियानमा हाम्रो सानो सहयोग रकमले पढाईमा सहयोग पुग्नुका साथै उनीहरुको हौसला बढ्ने आशा रहेको वीरप्रसाद कृष्णादेवी स्मृती समाजकी अध्यक्ष रेखा श्रेष्ठले बताईन् ।
कार्यक्रममा सम्पुर्ण संस्थापक सदस्यहरुको उपस्थिति रहेको थियो ।
के हो वीरप्रसाद कृष्णादेवी स्मृती समाज ?
वीरप्रसाद कृष्णादेवी स्मृती समाज छोरीहरुलाई शिक्षित बनाउने उदेश्यले खोलिएको संस्था हो ।
स्व.वीरप्रसाद श्रेष्ठ र कृष्णदेवी श्रेष्ठको स्मृतीमा ३ लाखका अक्ष्यकोष खडा गरि वि.सं २०६८ सालमा स्थापना भएको स्मृती समाजले त्यसबाट आउने ब्याजले प्रत्येक बर्ष छात्रवृत्ति प्रदान गर्ने गर्छ ।
स्मृती समाजले स्थापनादेखि नै महेन्द्र मोरङ आर्दश बहुमुखि क्याम्पसमा स्नात्तक तहमा अध्ययनरत गरिब तथा जेहन्दार छात्रा विद्यार्थीलाई छात्रवृत्ति प्रदान गर्दै आईरहेको छ ।
कसरी पाउने छात्रवृत्ति ?
विद्यार्थीहरुले यो छात्रवृत्तिका लागि स्मृती समाजले क्याम्पसमा दिएको छात्रवृत्ति फाराम भर्नुपर्ने छ भने विद्यार्थीको क्षमता र पारिवारिक अवस्था बुझी अन्तवार्ताबाट छनोट गरिने छ ।
माथिल्लो तहका लागि गरिब तथा जेहन्दार विद्यार्थीको छनौटमा महेन्द्र मोरङ सजिलो भएको जनाउँदै चाँडै नै+२ तहका विद्यार्थीलाई पनि यो छात्रवृत्ती वितरण गर्ने उद्देश्य रहेको वीरप्रसाद कृष्णादेवी स्मृती समाजका संस्थापक विजय श्रेष्ठले बताए ।
