१९ कात्तिक, बिराटनगर ।
सुनसरीको इटहरी उपमहानगरपालिका-८ मा रहेको एक किराना पसलबाट ठूलो परिणामको पटकासहित ३ जना पक्राउ परेका छन् । पक्राउ पर्नेहरुमा इटहरी उपमहानगरपालिका–११ का २५ बर्षीय प्यार चन्द चौधरी, २३ बर्षीय गणेश चौधरी र किराना पसल संचालक ताहिर मिया रहेका छन् ।
मियाको किराना पसलबाट प्रतिबन्धित बिष्फोटक पदार्थ पटकाहरु भण्डारण, ओसारपसार तथा बिक्रिवितरण भईरहेको भन्ने गोप्य सूचनाको आधारमा बुधबार दिउँसो ईलाका प्रहरी कार्यालय इटहरीबाट खटिएको प्रहरी टोलीले छापा मारेको थियो ।
सो क्रममा ३३ बण्डल बिभिन्न किसिमका पटका बरामद गरेको प्रहरीले जनाएको छ । पटका सहित पक्राउ परेका मानिसहरुलाई ईलाका प्रहरी कार्यालय इटहरीमा राखी कानुनी कारवाही अगाडी बढाईएको प्रदेश १ प्रहरी कार्यालय विराटनगरले जनाएको छ ।
यसैगरी झापाको अर्जुनधारा र नकलबन्दा क्षेत्रबाट ६ लाख ५० हजार बराबरको पटका बरामद भएको प्रहरीले जनाएको छ ।
