९ पौष, एजेन्सी । अमेरिकी राष्ट्रपति डोनाल्ड ट्रम्पले संसदको दुबै सदनले पारित गरेको सुरक्षा खर्च सम्बन्धी विधेयक राष्ट्रपतिको विशेषाधिकार ‘भिटो’ प्रयोग गरेर रोकिदिएका छन् ।
रिपब्लिकन र डेमोक्र्याटिक दुबै पार्टीका तर्फबाट ल्याइएको ७४० बिलियन डलर बराबरको सुरक्षा खर्च सम्बन्धी विधेयक सदनले यहि महिना पारित गरिएको थियो ।
तर आफूले भनेअनुसार विधेयक नआएको भन्दै ट्रम्पले भिटो प्रयोग गरेर उक्त विधेयकलाई कानून बन्नबाट रोकिदिएका हुन् ।
ट्रम्पले भिटो प्रयोग गरिदिएकाले अमेरिकी सरकारका संघीय निकायहरु महामारीको बेलामा ‘सटडाउन’ हुनसक्ने त्रास बढेको अन्तर्राष्ट्रिय समाचार संस्थाहरुले जनाएका छन् ।
अफगानिस्तान तथा युरोपमा रहेका अमेरिकी सैनिक फिर्ता बोलाउने संख्या र सीमा एवं सैनिक बेसबाट कन्फेडेरेड नेतृत्वको नाम हटाउने व्यवस्थामा ट्रम्पले आपत्ति जनाएका हुन् ।
रंगभेदलाई साथ दिने सेनाका पूर्व नेताहरुको नाम सैनिक बेसबाट हटाउने प्रस्तावप्रति ट्रम्पको आपत्ति रहेको हो । तर विधेयक भने सदनबाट अत्याधिक बहुमतले पारित भएको थियो ।
सदनले यस विधेयकलाई आवश्यक नै ठानेमा अब फेरि दुबै सदनको दुई तिहाई बहुमतबाट पारित गर्नसक्ने र राष्ट्रपतिको भिटो निष्क्रिय हुनेछ ।
यदि सदनले राष्ट्रपति ट्रम्पको भिटो खारेज गरेन भने ६० वर्षपछि पहिलो पटक नेशनल डिफेन्स अथोराइजेशन एक्ट कानून बन्ने छैन ।
ट्रम्पले भने विधेयकलाई ‘चीन र रुसका लागि उपहार’ को संज्ञा दिएका छन् ।
तल्लो सदनकी सभामुख न्यान्सी पेलोसीले भिटो प्रयागलाई लापरवाहीको पराकाष्ठा भएको टिप्पणी गरेका छन् ।
