९ पुष, काठमाडौं । नेकपाको प्रचण्ड माधव समूहको केन्द्रीय कमिटी बैठकमा बोल्दै नेकपाका अध्यक्ष माधवकुमार नेपालले सबै प्रकारका षड्यन्त्रलाई परास्त गर्ने बताएका छन् ।
नेपालले पार्टीका विरुद्ध भएका सबै प्रकारका षडयन्त्रलाई असफल पारेर पार्टीलाई एकताबद्ध, सुदृढ र क्रान्तिकारी दिशातिर अगाडी बढाउन सफल हुने विश्वास व्यक्त गरेको प्रवक्ता नारायणकाजी श्रेष्ठले बताए । त्यस्तै अध्यक्ष पुष्पकमल दाहाल प्रचण्डले ऐतिहासिक राजनीतिक परिवर्तनको रक्षा, संविधानको रक्षा, लोकतन्त्रको रक्षा र सुदृढ गरी देशलाई समृद्ध नेपाल बनाएर समाजवादको दिशा तर्फ अघि बढाउन संकल्प गर्दै संघर्ष गर्न तयार हुनुपर्ने आवश्यकता औँल्याएको प्रवक्ता श्रेष्ठले बताए । अध्यक्ष प्रचण्डले संर्घषमा दृढतापूर्वक र एकताबद्ध भएर लाग्न पार्टी नेता तथा कार्यकतालाई अपिल समेत गरेका छन् । पहिलो चरणको संघर्षको कार्यक्रम सकिएपछि अझै सशक्त र प्रभावकारी संर्घषका कार्यक्रम तय गर्ने प्रचण्ड–नेपाल पक्षको केन्द्रीय कमिटीको निर्णय छ ।
