सोल, जेठ १८
उत्तर र दक्षिण कोरियाको मन्त्रीस्तरको उच्चस्तरीय बैठक शुक्रबार बस्ने भएको छ । यसअघि उत्तर कोरियाले एकतर्फी रुपमा सो वार्ता स्थगित गरेको थियो ।
शुक्रबार दक्षिण कोरियामा पर्ने एक सीमाक्षेत्रीय गाउँ पानुमजोममा सो बैठक बस्ने भएको हो । उत्तर र दक्षिण कोरियाली उच्चस्तरीय अधिकारी सम्मिलित सो बैठक यसअघि उत्तर कोरियाले एकतर्फी रुपमा अकस्मात स्थगित भएको जानकारी दिएको थियो ।
उत्तर कोरियाले दक्षिण कोरियामा जारी रहेको दक्षिण कोरिया र अमेरिकाको सैन्य अभ्यासको विरोधगर्दै सो बैठक नबस्ने जनाएको थियो ।
तर त्यसयता भने यी दुई देशबीचको सम्बन्धमा सुधार आएको बताइएको छ । उत्तर कोरियाली उच्चस्तरीय अधिकारी सम्मिलित एक प्रतिनिधिमण्डल यस वार्ताका लागि उक्त पानुमजोम भिलेज पुगेको छ ।
सोही प्रतिनिधिमण्डलले उच्चस्तरीय बैठक पनि आयोजना गर्ने सहमति गरेको थियो । यो बैठका दुई कोरियाका मन्त्रीस्तरमा हुने समाचारमा जनाइएको छ ।
दुई कोरियाबीच गत अप्रिल २७ मा शान्ति सम्झौता भएको थियो । तर पछि परिस्थितिमा सकारात्मक परिवर्तन आएको छ ।
मे २५ मा यी दुई शका उच्च नेताहरु दक्षिण कोरियाली राष्ट्रपति मुन जाय इन र उत्तर कोरियाली नेता किम जोङ उनबीच पुनः भेटवार्ता भएको थियो ।
त्यस भेटमा दुई देशको अघिल्लो शान्ति सम्झौताको कार्यान्वयन गर्ने र अमेरिकासँगको उत्तर कोरियाको वार्ताका लागि सकारात्मक वातावरण बनाउने विषयमा सहमति भएको बताइएको थियो ।
अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच आगामी जुन १२ मा सिंगापुरमा उच्चस्तरीय बैठक हुन लागेको छ । त्यसअघि उत्तर र दक्षिण कोरियाका उच्च अधिकारीहरुबीचको यस बैठकलाई महत्वपूर्ण रुपमा लिइएको छ ।
यस वार्ता दुई देशको मन्त्रीस्तरमा हुने भएको हो । वार्ताका लागि पानुमजोम जानुअघि सम्वाददाताहरुसँग दक्षिण कोरियामा एकता मन्त्री च्यो म्यान गोले भने– हामीले आगामी अमेरिका उत्तर कोरिया वार्ता र कोरियाली प्रायद्वीपमा शान्ति स्थापनाका लागि आवश्यक छलफल गर्नेछौँ ।
उत्तर कोरियाली नेता मस्को जाने
यसैबीच प्राप्त अर्को एक समाचारअनुसार उत्तर कोरियाली नेता किम जोङ उन शिखर वार्ताका लागि रुसी राजधानी मस्को जाने भएका छन् ।
उनले रुसी राष्ट्रपति भ्लादिमिर पुटीनसँग भेटवार्ता गर्नेछन् । उनले अमेरिका र उत्तर कोरियाबीच आगामी महिना हुन लागेको शिखर वार्ताको विषयमा कुराकानी गर्नेभएका छन् ।
यसै प्रयोजनका लागि रुसी विदेशमन्त्री सेर्गेइ लाभरोभ पनि बिहीबार उत्तर कोरिया पुगेका थिए । त्यसपछि नेता किम नै रुस जाने यो घोषणा आएको हो ।
लाभरोभ उत्तर कोरियाको आणविक कार्यक्रमका बारेमा आफ्ना उत्तर कोरियाली समकक्षीसँग वार्ता गर्न त्यहाँ पुगेका हुन्। उनीहरुले यस विषयमा कुराकानी गरेका छन् ।
उक्त विज्ञप्तिमा विदेशमन्त्री लाभरोभले आफ्ना उत्तर कोरियाली समकक्षी रि योङ हिसँग द्विपक्षीय वार्ता गरेका छन्। उनको आमन्त्रणमा विदेश मन्त्री लाभरोभ त्यहाँ पुग्नु पुगेका थिए ।
उत्तर कोरियाली समाचार संस्थाका अनुसार उत्तर कोरियाली नेता किम केही दिनमा त्यसतर्फ लाग्नेछन् ।
तर उनी कहिले मस्को जान्छन् भन्ने बारेमा भने सो समाचार समितिले केही खुलाएको छैन ।
रासस
