७ जेठ, काठमाडौं ।
प्रधानमन्त्री केपी शर्मा ओलीले संविधानको धारा ७६ को उपधारा ५ अनुसार सरकार निर्माण गर्न नसके आफूलाई समर्थन गर्न आग्रह गरेका छन् ।
प्रधानमन्त्री ओलीले शुक्रवार आकस्मिक पत्रकार सम्मेलन गरी सके आफूविरुद्ध सरकार गठन गर्न चुनौती दिए । सहमति जुट्न नसके आफूलाई समर्थन गर्न उनले आग्रह गरे ।
ओलीले संविधानको धारा ७६ को उपधारा ५ अनुसार आफूले पनि प्रधानमन्त्रीको दाबी गर्न सक्ने बताए । सर्वत्र असहयोगका कारण सरकारको नेतृत्व गर्न मन नलागेर विश्वासको मत लिने कामबाट हात उठाएको बताए पनि उनले फेरि पनि सरकारको दाबी भने गर्ने बताएका हुन् ।
उनले विश्वासको मत नदिए प्रतिनिधि सभा विघटन हुन सक्ने र त्यसको जिम्मेवार आफू नहुने बताए । प्रधानमन्त्री ओलीले संविधानको धारा ७६ को उपधारा ५ अनुसार आफू प्रधानमन्त्री भए र त्यसपछि विश्वास प्राप्त गर्न नसके संसद् विघटन हुने र त्यसको आरोप आफूलाई लगाउन नमिल्ने तर्क गरे ।
उनले भने, ‘प्रतिनिधि सभा सदस्यको हिसाबले मैले दाबी गर्न सक्छु । म पनि दाबी गर्ने प्रयासमा छु । दाबी गर्न सक्छु । अहिलेसम्म मसँग एक सय २१ को मतभार छ । मलाई अलि सजिलो होला कि भनेर कोसिस गरिरहेको छु ।
यदि समर्थन प्राप्त भयो र त्यो राष्ट्रपतिलाई भरपर्दो आधार लागेर नियुक्त गर्नुभयो भने मैले सरकार बनाउँछु अनि एक महिनाभित्र फेरि विश्वासको मत लिनेछु । फेरि विश्वासको मत नदिएर अनि विघटन (प्रतिनिधि सभा) ग¥यो भनेर आरोप लगाउन पाइने छैन । विश्वासको मत नदिने अनि चुनावमा गयो भन्न त पाइने छैन ।’
