२५ असार, कैलाली । कैलालीको टीकापुरमा बुधबार मृत फेला परेका साढे तीन वर्षीय नाबालक विवेक बिष्टको हत्या आरोपमा प्रहरीले दुई किशोरीलाई पक्राउ गरेको छ । नाबालक विष्टकी दिदी नाता पर्ने १५ वर्षीया किशोरी र उनकी साथीलाई प्रहरीले पक्राउ गरेको हो ।
इलाका प्रहरी कार्यालय टीकापुरमा पत्रकार सम्मेलन गर्दै कैलालीका प्रहरी प्रमुख प्रहरी उपरीक्षक विश्व अधिकारले हत्या आरोपमा दुई किशोरीलाई पक्राउ गरिएको जानकारी दिए ।
एसपी अधिकारीले प्रारम्भिक अनुसन्धानको क्रममा विवेककी दिदी नाता पर्ने किशोरीले हत्या गरेको प्रहरी अनुशनधानमा स्वीकार गरेको बताए ।
२१ असार बिहान ११ बजे कैलालीको टीकापुर नगरपालिका–१ ब्लक नम्बर ८ स्थित मनुवा रोड बस्ने दिलिप विष्टका साढे तीन वर्षका छोरा विवेक दिदी नाता पर्ने १५ वर्षीया किशोरीसंग जामुन खान गएका थिए ।
युवती मात्रै घर फर्किएपछि विवकेका बुवाले खोज तलासका लागि इलाका प्रहरी कार्यालय टीकापुरमा निवेदन दिएका थिए ।
प्रहरीका अनुशार घर फर्केकी किशोरीले रुखमा जामुन नभएको र भाइलाई घरतर्फ पठाएको तर जिद्धी गरेर आफन्तको घरमा जान्छु भनेको परिवारलाई जानकारी गराएकी थिइन्। ति किशोरीले आफू भने साथीको घरमा गएको बताएकी थिइन् ।
बालक बेपत्ता भएपछि एसपी अधिकारी सोमबार राती नै जिल्ला सदरमुकामबाट टीकापुर पुगेका थिए । असार २३ गते बेलुका बालक हराएको ठाउँबाट झण्डै ५ किलोमिटर टाँढा टीकापुर नगरपालिका–४ घोयली वनमा जमरा कुलोको किनारतर्फ विवकेको शव फेला परेको थियो ।
एसपी अधिकारीका अनुसार दिदी पर्ने किशोरीले टीकापुर नगरपालिका वडा नम्बर १ ब्लक नम्बर ५ बस्ने साथीलाई घटना घटेकै दिन दुई वटा चाँदीको बाला राख्न दिएको खुल्न आएको र सो बालाहरु बालकको भएको परिवारजनले सनाखत गरेका थिए ।
एसपी अधिकारीका अनुसार अनुसन्धानको क्रममा पारिवारिक रिसिबीका कारण ति किशोरीले हत्याको योजना बनाएको समेत खुलेको छ । कुलोको डिलमा लगेर खुट्टामा लगाएको चाँदीको बाला निकाल्दै धक्का दिएर हत्या गरेको ति किशोरीले प्रहरीसमक्ष स्वीकार गरेकी छिन् ।
एसपी अधिकारीले किशोरीले अपराधिक योजना कसरी बनाइन भन्ने विषयमा समेत प्रहरी अनुशन्धान केन्द्रित भएको बताएका छन् । एसपी अधिकारी प्रहरी प्रधान कार्यालय काठमाडौबाट केही दिन अघि मात्रै सरुवा भएर कैलाली गएका हुन् ।
