३० असार, एजेन्सी ।
क्युवामा सरकार विरोधी प्रदर्शनको क्रममा एकजनाको मृत्यु भएको अधिकारीहरुले पुष्टि गरेका छन्।
सरकार विरोधी दुर्लभ प्रदर्शन सुरु भएयताको यो पहिलो पुष्टि भएको मानवीय क्षति हो।
मृत्यु हुने व्यक्ति ३६ वर्षका डिउबिस लौरेन्सिओ तेहेडा रहेको क्युवाको सरकारी सञ्चारमाध्यमले जनाएको छ। उनको राजधानी हवानाको बाहिरी क्षेत्रमा सोमबार मृत्यु भएको हो।
सरकारी सम्पत्तिमा आक्रमण गर्नेहरु मध्ये उनी एक रहेको दाबी अधिकारीहरुले बताएका छन्। तर प्रत्यक्षदर्शीहरुले भने सुरक्षाकर्मीहरुले प्रदर्शनमा सहभागीहरुलाई निशाना बनाएको बताएका छन्।
क्युवामा गएको आइतबारदेखि देशव्यापी रुपमा सरकारविरोधी प्रदर्शन सुरु भएको हो। प्रदर्शनमा सहभागी भएका मध्ये दर्जनौँ व्यक्ति पक्राउ परेका छन्। सञ्चारमाध्यम तथा विपक्षीहरुका अनुसार केही दशक यताकै ठूलो सरकार विरोधी प्रदर्शनमा हजारौँ मानिस सहभागी भएका छन्।
क्युवाका नागरिकहरु अस्तव्यवस्त बनेको अर्थतन्त्र तथा खाद्यान्न, औषधिसहितको अभावलाई लिएर आक्रोशित छन्। यस्तै कोरोना भाइरस महामारी नियन्त्रणका लागि सरकारले गरेको कमजोर प्रयास तथा मूल्य वृद्धिका कारण पनि क्युवनहरु सरकारप्रति आक्रोशित रहेका छन्।
क्युवामा विरोध प्रदर्शनमा सहभागी हुनेहरुलाई कडा कारवाहीको व्यवस्था रहेकाले यस प्रकारको प्रदर्शनलाई महत्वपूर्ण मानिन्छ। प्रदर्शनकारीहरुले स्वतन्त्रता माग गर्दै अधिनायकवाद अन्त्य हुनु पर्ने भन्दै नारावाजी गरेका छन्।
कम्युनिष्ट मुलुक क्युवाका राष्ट्रपतिले आफ्ना समर्थकलाई प्रदर्शनकारीको प्रतिवाद गर्न आग्रह गरेका थिए। राष्ट्रपति मिगुएल डियाज–कनालले टेलिभिजनमार्फत सम्बोधन गर्दै आफ्नो देशमा अहिले भएको प्रदर्शनमा अमेरिकाको हात रहेको आरोप पनि लगाएका थिए।
