एजेन्सी,असार ३२
रुसमा सम्पन्न विश्वकप फुटबल – २०१८ को उपाधि फ्रान्सले हात पारेको छ ।रुसको सेन्ट मस्कोस्थित लुजनिकी रङ्गशालामा अार्इतबार सम्पन्न फाइनल खेलमा युरोपेली राष्ट्र फ्रान्सले युरोपकै क्रोएसियालाई ४–२ गोलअन्तरले हराउँदै सन् १९९८ यता झन्डै बीस बर्ष पछि विश्वकप फुटबलको उपाधि चुमेको हो ।
खेलको १८औँ मिनेटमा क्रोएसियाका मारियो मान्जुकिकले आफ्नै पोष्टमा आत्मघाती गोल गरेका थिए । खेलको २८औँ मिनेटमा क्रोएसियाका इभान पेरिसिकले गोल गर्दै खेललाई बराबरी गरेका थिए । फ्रान्सका एन्टोनी ग्रिजम्यानले पेनाल्टी मार्फत गोल गरी २–१ को स्थितिमा पु¥याएका थिए ।
मध्यान्तरपछिको खेलमा पाउल पोग्बाले फ्रान्सका लागि तेस्रो गोल गरे । केलियन एमबाप्पेले ६५औँ मिनेटमा डिबक्स नजिकबाट फ्रान्सका लागि चौथो गोल गरे । खेलको ६९औँ मिनेटमा क्रोएसियाका मान्जुकिकले गोल गरे पनि हारलाई भने टार्न सकेनन् ।
फ्रान्सले सन् १९९८ मा आफ्नै भूमिमा पहिलो पटक विश्वकप फुटबलको उपाधि जितेको थियो भने क्रोयसियाले अहिलेसम्म उपाधि जित्न सकेको छैन ।युरोपको सानो राष्ट्र क्रोएसिया भने पहिलो पटक उपाधिका लागि भिडेको हो ।
यसअघि सेमिफाइनलमा फ्रान्सले बेल्जियमलाई १–०ले पराजित गरेको थियो भने क्रोएसियाले बेलायतलाई २–१ गोलअन्तरले हराउँदै फाइनलमा स्थान सुरक्षित गरेको थियोे । क्रोएसिया अनपेक्षित परिणाम निकाल्दै फाइनलमा पुगेको थियो । ब्राजिल, जर्मनी, स्पेन, अर्जेन्टिना जस्ता विश्वकप उपाधि जितिसकेका हस्तीहरु पराजित भई घर फर्केको अवस्थामा क्रोएसिया सबैलाई चकित पार्दै उपाधिको दाबेदार बनेको थियो ।
विश्वकपमा लुका मोड्रिच यो विश्वकपका सर्वोत्कृष्ट खेलाडी भएका छन् भने सर्वाधिक ६ गोल गरेका ह्यारी केनलाई गोल्डेन बुट दिईएको छ । त्यसैगरी फ्रान्सका १९ वर्षीय स्ट्राइकर एम्बाब्पे योङ प्लेयर अफ द टुर्नामेन्ट घोषित भएका छन् । कुनै बेला नेपालसँगै फिफा वरियतामा रहेको क्रोएसिया यो विश्वकपमा मोड्रिचकै प्रेरणादायी प्रदर्शनमा फाइनलसम्म पुग्न सफल भएको हो ।
दोस्रो पटक विश्वकप जित्ने क्रममा फ्रान्सले ३८ मिलियन डलर नगद पुरस्कार हात पारेको छ भने फाइनलमा पराजित भएको क्रोएसियाले २८ मिलियन डलर जितेको छ । प्रतियोगिताका जम्मा ३२ टिमलाई फिफाले ४०० मिलियन डलर दिइएको छ।
तेस्रो भएको बेल्जियमले पुरस्कारस्वरूप २४ मिलियन डलर र चौथो नम्बरमा रहेको इङ्ग्ल्यान्डलाई २२ मिलियन डलर मिलेको छ।क्वार्टर फाइनलमा हारेका उरुग्वे, ब्राजिल, स्वीडेन र रूसको भागमा १६÷१६ मिलियन डलर परेको छ ।
प्रिक्वार्टर फाइनलमा हार्ने देशहरु अर्जेन्टिना, पोर्चुगल, डेनमार्क, स्पेन, मेक्सिको, जापान, स्विट्जरल्यान्ड र कोलम्बियाको टिमले १२÷१२ मिलियन डलर प्राप्त गरेका छन् ।त्यस्तै समुहचरणबाट बाहिरिएका टिमलाई पनि ८÷८ मिलियन डलर नगद दिइएको छ ।
क्रिकेट विश्वकपसँग तुलना गर्ने हो भने फुटबल विश्वकप जित्दा ३९ गुणा धेरै रकम विजेता टिमलाई दिइयो । क्रिकेट विश्वकपमा सन् २०१५ मा १ करोड डलर पुरस्कार दिइएको थियो ।
