४ असोज, काठमाडौं ।
नेकपा माओवादी केन्द्रका अध्यक्ष पुष्पकमल दाहाल प्रचण्डले गठबन्धन नबनाएको भए केपी ओलीलाई बालुवाटारबाट हटाउन सम्भव नभएको बताएका छन्।
सोमबार पार्टी कार्यालय पेरिसडाँडामा सूर्यनाथ राम यादवको स्मृतिमा आयोजित कार्यक्रममा प्रचण्डले लोकतन्त्र, गणतन्त्र, संघीयतालाई जोगाउन लोकतन्त्र पक्षधरहरु एकठाउँमा उभिनुपर्ने बताए।
मोर्चा बनाएका छौं त्यो नबनाएको भए निरंकुश र तानाशाह जस्तो र आफूलाई श्री ५ जस्तो गर्न खोजेका केपी ओलीलाई बालुवाटारबाट गलहत्याएर लान त सकिने थिएन। विना गठबन्धन त सम्भव थिएन’ प्रचण्डले भने। केपी ओली झुट र धोकाका पर्यायनै भएको प्रचण्डको आरोप थियो।
’केपी ओली छन् नि झुट बोल्न त्यतिको सिपालु मान्छे सायद नेपालमा अरु छैनन्। धोका चाँही आफूले दिने। धोकै धोकाको छ तिनको जीवन तर सजिलै अर्कोलाई धोकेवाज भन्छन्’ उनले भने।
केपी ओलीले उखान टुक्का भन्दा ताली बजाउने देखेर आफू हैरान भएको भन्दै प्रचण्डले भने, ’केपी ओलीले उखान टुक्का भन्दा ताली लगाउने देखेर हैरान हुन्छु। के बुझेर तालि लाउँछन् मानिसले?’
बालुवाटारबाट निकालिँदा पनि ओली बाजा बजाएर बालकोट गएको भन्दै प्रचण्डले टिप्पणी गरे।
’हुन त केपी त्यस्ता मान्छे हुन् जो मलामी जाँदा नि बाजा बजाउँदै नाच्दै हिँडिदिन्छन्। मान्छे दंगै पर्छन्, किनभने बालुवाटारबाट बालकोट जाने भनेको त हारेको, सन्नाटा भएर बडो निराश भएर अब के गर्ने? फेरि कसरी आउने होला? भनेर सोच्दै जानु पर्नेमा पञ्चेबाजा बजाएर, धिमे बाजा बजाएर मानौं ठूलो जित हासिल गरेको जस्तो।’
त्यस काममा निकै करोड खर्च भएको आफूले थाहा पाएको उनले बताए। ’त्यस्तो त्यस्तो नाटक गर्न सिपालु छन् तिनी हामी चाँही त्यस्तो नबनौं भन्ने हो’ प्रचण्डले भने।
