चितवन, साउन २५
गृहमन्त्री रामबहादुर थापा बादलले फेक इन्काउन्टर हल्ला मात्र भएको बताएका छन् । भरतपुर विमानस्थलमा शुक्रबार सञ्चारकर्मीहरुसँग कुरा गर्दै गृहमन्त्री बादलले यस्तो बताएका हुन् ।
उनले अपहरणकारीलाई २४ घन्टामा निस्तोज पार्न सरकार सफल भएको समेत दावी गरेका छन् । गृहमन्त्री बादलले ११ वर्षीय बालक निशान खड्काका अपहरणकारीहरु इन्काउन्टरमै मारिएको दाबी गरे ।
गृहमन्त्री बादलले अपहरणकारीहरु प्रहरीको गोलीबाट मारिएकोमा सन्तोष प्रकट गद अपहरणकारी र हत्यारालाई निस्तेज पार्न सरकार सफल भएको बताए ।
उनले विहीबार सिंहदरबारमा बसेको प्रतिनिधिसभा राज्य व्यवस्था तथा सुशासन समितिको बैठकमा इन्काउन्टरबारे गृहमन्त्रालयले छानविन गर्ने बताएका थिए । तर, त्यसबारे छानविन नगर्दै शुक्रबार गृहजिल्ला चितवन पुगेका मन्त्री बादलले त्यो फेक इन्काउन्टर नभएको दावी गरेका हुन् ।
भक्तपुरमा बालक निशान खड्काको अपहरणपछि हत्या हुँदा र त्यसपछि प्रहरीले अपहरणकारीमाथि गोली चलाउँदा गृहमन्त्री थापा नेपालमा थिएनन् । त्यसबेला मन्त्री थापा इण्डोनेसियाको बालीमा आयोजित एक कार्यक्रममा भाग लिन गएका थिए ।
