१० फागुन, सुनसरी । सुनसरीको धरान रोडमा सडक छेउमा टुक्रा टुक्रा पारी विभत्स हत्या गरिएको अवस्थामा फेला परेको शवको सनाखत भएको छ ।
उक्त शव झापाको दमक नगरपालिका–५ का दिनेश सिग्देलको भएको खुलेको इलाका प्रहरी कार्यालय, धरानले जनाएको छ ।
प्रहरीका अनुसार सिग्देल बहराइनबाट पुस २० गते नेपाल फर्किएका थिए ।
काठमाडौंबाट उनी सिधै विराटनगरस्थित कान्छी श्रीमतीकहाँ गएको प्रहरीले जनाएका छन् । त्यसैले पारिवारिक समस्या कारण उनको हत्या भएको हुनसक्ने आशंका गरिएको छ ।
प्रहरीले अनुसन्धानका लागि केही व्यक्तिलाई नियन्त्रणमा लिएर थप अनुसन्धान अघि बढाएको छ ।
गत साता धरान–भेडेटार सडक खण्डमा पर्ने जंगलमा सडक छेउमा जेब्रा झोलाभित्र टाउको, खुट्टा र त्यसको भोलिपल्ट सोही ठाउँमा शरीर भेटिएको थियो ।