विप्लवका प्रवक्ता विश्वकर्माद्धारा करोडौं चन्दा अशुल गरेको स्वीकार

काठमाडौं, साउन ३०
नेकपा विप्लव समूहका प्रवक्ता खड्गबहादुर विश्वकर्मा (प्रकाण्ड)ले विभिन्न व्यक्तिहरुसँग करोडौँ चन्दा अशुल गरेको स्वीकार गरेका छन् । अनुसन्धान अधिकारीहरु समक्ष समक्ष बयान दिने क्रममा उनले आर्थिक, भौतिक र नैतिक हिसाबले हामीले सहयोग लिएको स्वीकार गरे ।

उनले चन्दा नभइ, सहयोग लिएको दावी गरेका छन् । विप्लव समूहका प्रवक्ता प्रकाण्ड हेटौंडाबाट काठमाडौं आउने क्रममा २३ साउनमा पक्राउ परेका थिए । उनलाई काठमाडौं प्रहरीको हिरासतमा राखिए पनि अनुसन्धान भने विशेष ब्यूरो र केन्द्रीय अनुसन्धान ब्यूरो (सीआईबी) ले गरेको छ ।

जिल्ला अदालत काठमाडौंले बुधबार मात्र उनलाई थप दुई दिन थुनामा राखेर अनुसन्धान गर्न अनुमति दिएको छ । प्रकाण्डलाई बन्दी प्रत्यक्षीकरण मुद्दामा भोलि सर्वोच्चमा उपस्थित गराउन महानगरीय प्रहरी परिसर काठमाडौंको तयारी छ । सर्वोच्चले सोमबार बाटोको म्याद बाहेक ४८ घण्टाभित्र उपस्थित गराउन आदेश दिएको थियो । प्रकाण्ड एक सातादेखि प्रहरी हिरासतमा रहेका छन् । ।