७ चैत्र, तनहुँ ।
नाबालिगलाई बलात्कार गरेको आरोपमा हिरासतमा रहेका अभिनेता पल शाहविरुद्धको अनुसन्धान प्रतिवेदन जिल्ला प्रहरी कार्यालय तनहुँले सरकारी वकिलको कार्यालयलाई बुझाएको छ ।
जिल्ला प्रहरी कार्यालय तनहुँमा नाबालिग गायिकाले शाहले बलात्कार गरेको उजुरी दिएकी थिइन् । उजुरीपछि १५ फागुनमा शाह तनहुँ प्रहरीमा उपस्थित भएका थिए । २१ दिनपछि प्रहरीले उनीमाथिको अनुसन्धान सकेर सरकारी वकिलको कार्यालयमा पेस गरेको जिल्ला न्यायाधिवक्ता रामचन्द्र शर्माले जानकारी दिए ।
यसअघि शाहविरुद्धको अनुसन्धान नवलपरासी प्रहरीले पनि सकेर सरकारी वकिलको कार्यालयमा पेस गरेको थियो । उक्त मुद्दा अदालत पुगिसकेको छ । सरकारी वकिलको कार्यालय तनहुँले प्रहरीको अनुसन्धान प्रतिवेदन अध्ययन पछि अदालत पेस गर्नेछ ।
