काठमाडौं । महानगरपालिका र उपमहानगरपालिकाको सिट बाँडफाँटका लागि सोमबार दोस्रोपटक बसेको सत्ता गठबन्धनको बैठक भागबण्डा टुंगो नलगाई स्थगित भएको छ ।
सोमबार साँझ बालुवाटारमा बसेको बैठकमा प्रस्तावित सिट बाँडफाँटको मस्यौदामाथि छलफल भए पनि कतिपय पालिकाको विषयमा दलहरुको आ आफ्नै दाबी रहेको कारण सहमति नभएको हो ।
बैठक मंगबार विहान फेरि बस्नेगरि स्थगित भएको माओवादी अध्यक्ष प्रचण्डका स्वकीय सचिव तथा माओवादी केन्द्रीय सदस्य रमेश मल्लले जानकारी दिए ।
कांग्रेसले पोखरा महानगरसहित इटहरी र कलैया उपमहानगरमा दावी यथावत राखेको छ । एकीकृत समाजवादीले ६ मध्ये १ महानगर आफूले पाउनैपर्ने र पोखरा उपयुक्त हुने बताउँदै आएको छ । पोखरामा समाजवादीले दावी यथावत राखेपछि तत्कालै पोखराबारे निर्णय नलिने विषयमा पनि गठबन्धनमा छलफल भएको छ । ‘पोखरामा अहिले कांग्रेस र समाजवादी दुवैले दावी गर्ने । मनोनयन दर्ता गर्ने बेलासम्म जसको माहोल राम्रो देखिन्छ उसैले लिनेगरी मध्यमार्गी प्रस्तावमा पनि छलफल भएको छ’, बैठकमा सहभागि भए नेताले भने ।
