२७ जेष्ठ , विराटनगर । स्यानिटरी प्याड, वनस्पति तेल र एमएस वायरमा आधारित तीन थरीका उद्योगका समस्याको सम्बोधन गर्नुपर्ने माग राख्दै सडक आन्दोलनमा उत्रिएका पूर्वका उद्योगीहरुले अर्थमन्त्री जनार्दन शर्मासँग भेट गरेका छन् ।
भेटका क्रममा अर्थमन्त्रीले समस्या समाधानका लागि असार १ गतेदेखि नै आफूले काम सुरु गर्ने आश्वासन दिएका छन्।
अर्थ मन्त्रालयको आमन्त्रणमा वार्तामा पुगेकाउद्योगीसँग मन्त्री शर्माले जेठ ३० गते बजेट पारित भएपछि तीन उद्योगका समस्या समाधान गर्ने वचनबद्धता प्रकट गरेका हुन्।
वार्तामा जेठ ३० गते बजेट पास भएपछि तत्कालै असार १ देखि म समस्याको सम्बोधन गर्ने अर्थमन्त्रीले वचन दिएको प्रिमियर वायरका सञ्चालक पवनकुमार शारडाले जानकारी दिए ।
वार्तामा मन्त्री शर्मा जिआई वायरको निर्यात भएपछि त्यसको कच्चापदार्थ एमएस वायरमा लाग्ने अन्तःशुल्कको रकम पनि फिर्ता गर्न राजी हुनुभएको उद्योग सङ्गठन मोरङका अध्यक्ष प्याकुरेलले बताएका छन् ।
वार्तामा नेपाल उद्योग वाणिज्य महासंघका अध्यक्ष शेखर गोल्छा, नेपाल उद्योग परिसंघका अध्यक्ष विष्णुकुमार अग्रवाल, मोरङ व्यापार संघका अध्यक्ष नवीन रिजाल, उद्योग सङ्गठन मोरङका अध्यक्ष सुयश प्याकुरेल, सिएनआई प्रदेश १ का अध्यक्ष भीम घिमिरे, शारडा ग्रुपका अध्यक्ष शिवरतन शारडा, हुलास वायरका सञ्चालिका युक्ति गोल्छा, मोरङ व्यापार संघका महासचिव अनिल शारडा लगायतका उद्योगीले स्यानिटरी प्याड, वनस्पति तेल र एमएस वायरमा आधारित तीन थरीका उद्योगलाई बजेटले पुर्यााएको संकटका बारेमा अर्थमन्त्रीलाई जानकारी गराएका थिए ।
सो क्रममा उद्योगीहरुले अर्थमन्त्रीलाई मागपत्र समेत बुझाएका थिए । तीन वटै व्यावसायिक सङ्गठनले आजै प्रदेश नं. १ को मुख्यमन्त्री तथा मन्त्रीपरिषदको कार्यालयसम्म शान्तिपूर्ण सांकेतक विरोध र्याली गर्दै प्रदेश नं. १ का प्रमुख सचिव डा. रामप्रसाद घिमिरेज्यूलाई ज्ञापन पत्र बुझाएका थिए ।
आ.व.२०७९÷८० का बजेट नीतिहरुको विरोधमा मोरंग व्यापार संघको नेतृत्वमा थालिएको विरोध कार्यक्रममा उद्योगी तथा ब्यापारीहरु विराटनगर बजार हुँदै प्रदेश नं. १ को मन्त्रीपरिषदको कार्यालयसम्म शान्तिपूर्ण सांकेतक विरोध र्यालीसहित पुगेका थिए ।
व्यापार संघका अध्यक्ष नवीन रिजालले विराटनगरका तीन व्यावसायिक सङ्गठनले चलाइरहेको आन्दोलन के गर्ने भन्ने विषयमा शनिबार तीन वटै सङ्गठनको संयुक्त बैठक बसेर निर्णय गरिने जानकारी दिएका छन् ।
बिहीबार उनीहरुले मोरङको बूढीगंगामा सडक प्रर्दशन गर्दे बजेटका नीतिको विरोध गरेका थिए ।
