१६ साउन, काठमाण्डौ ।
महोत्तरीको बर्दिबासमा भएको आगलागी नियन्त्रणमा आएको छ।सोमबार दिउँसो सवा २ बजे बर्दिबास नगरपालिका २ बजारस्थित सिद्धार्थ बैंक समेत भएको घरको तेस्रो तलामा आगलागी भएको थियो।अहिले नियन्त्रणमा आइसकेको इलाका प्रहरी कार्यालय बर्दिबासका प्रहरी नायब उपरीक्षक रवि रावलले जानकारी दिए।
महमद फारूखको तीन तले घरमा आगलागी भएको प्रहरीले जनाएको छ।आगो अभिषेक झाले सञ्चालन गर्दै आएको घरको तेस्रो तलामा रहेको ३६५ फिटनेश जिममा लागेको हो।आगो नियन्त्रणमा लिन दुई वटा दमकल प्रयोग भएको थियो। प्रहरी नायब उपरीक्षक रावलका अनुसार आगो जिमको ट्रेडमिलबाट सल्किएको हो।‘ट्रेडमिलमा इलेक्ट्रिक सर्ट भएर आगो सल्किएको रहेछ,’ उनले भने।
अहिले क्षतिको विवरण संकलन गर्ने काम भइरहेको छ। जिममा भएका सामान जलेर ९० लाख बराबरको क्षति भएको प्रहरी नायब उपरीक्षक रावलले बताए।घटनास्थलमा प्रहरी, सशस्त्र प्रहरी र स्थानीय खटिएका थिए।