Nepal Times
Nepal Times
279
Shares

चुनावमा ५ दल एक, भदौमा सिट बाड्ने / बाबुराम र वामदेव गठबन्धन बाहिरै

चुनावमा ५ दल एक, भदौमा सिट बाड्ने / बाबुराम र वामदेव गठबन्धन बाहिरै

२० साउन, काठमाण्डौ ।

सरकारले आगामी मंसिर ४ गतेका लागि  प्रतिनिधि सभा र प्रदेश सभाको चुनावको मिति  घोषणा गरेपछि बसेको सत्तारुढ पाँच दलको बैठकले चुनावमा तालमेल गरेर जाने औपचारिक  निर्णय गरेको छ ।  सत्ता गठबन्धनका शीर्ष नेताबीच आज चुनावी तालमेल गरेर जाने सहमति भएको हो । बालुवाटारमा बसेको गठबन्धनको बैठकले भदौ पहिलो साता तालमेलको काम सम्पन्न गर्ने निर्णय गरेको एकीकृत समाजवादीका सम्मानित नेता झलनाथ खनालले जानकारी दिएका छन् ।

 यसका लागि सत्तारुढ पाँच दलले आगामी प्रदेश तथा प्रतिनिधिसभा निर्वाचनका लागि सिट बाँडफाँट गर्न कार्यदल बनाउने भएका छन्।   पाँच दलभित्रैका दुई दलहरुबीच मात्रै गठबन्धन गर्न सकिने गरी बैठकले सहमति जुटाएको सहभागी एक नेताले बताएका छन्। पाँच दलभित्रै पनि उपगठबन्धन बनाउन पाइने सहमति भएको छ। सिट बाँडफाड समितिमा प्रत्येक पार्टीबाट दुईदेखि तीनजना रहने छन् ।

उक्त समितिले दिएको प्रतिवेदनका आधारमा गठबन्धनले सिट बाँडफाँट गरेर चुनावी अभियानमा होमिने  छ।  पाँच दलबीच चुनावमा मिलेर जाने सहमति भएपछि जसपाबाट फुटेका डा. बाबुराम भट्टराई र बामदेव गौतमलाई गठबन्धनमा सहभागी नगराइने भएको छ ।  पाँच दलभित्रको गठबन्धनलाई निरन्तरता दिने भनेपछि अन्य पार्टीलाई सहभागी गराउने च्याप्टर क्लोज भएको नेताहरुले बताएका छन् ।

बामदेव गौतमले नेकपा (एकता राष्ट्रिय अभियान) दल दर्ता गर्दै कम्युनिस्टहरु एक गर्ने अभियानमा थिए। उनले तत्कालिन नेकपाका बहुमत सदस्यहरुसँग पटक पटक वार्ता गरेका थिए।  उता, जनता समाजवादी पार्टी छाडेका डा. भट्टराई पनि पछिल्लो समय माओवादी केन्द्रका अध्यक्ष पुष्पकमल दाहाल प्रचण्डसँग नजिकिएका थिए। चुनावी सहकार्यकै लागि उनले प्रचण्डसँग भेट समेत गरेका थिए। उनले समाजवादी केन्द्र बनाउने प्रस्ताव गरेपनि प्रचण्डले अन्तिम समयमा आएर समाजवादी केन्द्र नबन्ने उद्घोष गरेका थिए ।

गएको स्थानीय तहको निर्वाचनमा पनि तालमेल गरेका पाँच दलले  कांग्रेसका वरिष्ठ नेता रामचन्द्र पौडेलको नेतृत्वमा उच्चस्तरीय राजनीतिक संयन्त्र बनाएका थिए । त्यो संयन्त्रले स्थानीय तहको तालमेल मोडालिटी बनाएको थियो। तर, ३ सय स्थानीय तहमा मात्र तालमेल भएको, केही तालमेलमा गठबन्धनभित्र असहयोग भएपछि अहिले भने सुरुदेखि नै गठबन्धनले बनाएको समितिमार्फत निर्वाचन क्षेत्र बाँड्ने तयारी रहेको छ ।    प्रतिनिधिसभाका १६५ सिटमा कांग्रेसले ६०÷४० को प्रस्ताव राख्ने तयारी गरेको छ ।

कांग्रेसले गठबन्धनमा ९९ सय सिट आफूले लिने र बाँकी अन्य घटकलाई दिने मनसाय राखेको छ । त्यसो गर्दा समानुपातिकको मत जोड्दा कांग्रेस एकल वहुमतको नजिक पुग्ने अपेक्षा नेताहरुले गरेका छन् । तर काग्रेसको बहुमत आउने गरी उसलाई जिताउन मात्रै तालमेल नगर्ने नेकपा एसका सम्मानित नेता झलनाथ खनालले बताउदै आएका छन् ।

स्थानीय तहमा केन्द्रमा सहमतिभएपनि स्थानीय तहमा आफू अनुकुलका तालमेल भएका थिए । कतिपय स्थानीय तहमा एमालेसँग पनि गठबन्धनका दलहरुले तालमेल गरेका थिए । गठबन्धन भित्रपनि खास गरी जसपा र नेकपा एसले भने तालमेलबाट धोका भएको आरोप लगाएका थिए ।

तपाईंको प्रतिक्रिया

© copyright 2022 and all right reserved to Nepal Times | Design By : InDesign Media Pvt. Ltd.