Nepal Times
Nepal Times
3
Shares

लालबाबुको पद धरापमा, राजीनामाको फण्डा के हो ?

लालबाबुको पद धरापमा, राजीनामाको फण्डा के हो ?

७ भदौ ,काठमाण्डौ ।

सरकारले संघ र प्रदेशका लागि निर्वाचन तोकिसकेको अवस्थामा मधेस प्रदेशका मुख्यमन्त्रीको राजीनामाको विषयले अहिले नयाँ स्वरुप लिएको छ । मधेश प्रदेशका मुख्यमन्त्री लालबाबु राउतलाई पदबाट राजीनामा दिन आफूले निर्देशन नदिएको जनता समाजवादी पार्टी नेपाल (जसपा) का अध्यक्ष उपेन्द्र यादवले बताएका छन् ।

स्वच्छता अभियान र बेटी पढाउ बेटी बचाउ अभियानमा भ्रष्टाचार भएको भन्दै उपेन्द्रले मुख्यमन्त्री राउतको राजीनामा माग गरेको खबर सार्वजनिक भएको थियो । तर, आज बिहान जनकपुर पुगेका यादवले ती खबरहरुमा सत्यता नभएको बताएका छन् । ‘मुख्यमन्त्री राउतलाई पदबाट राजीनामा दिन पार्टीले निर्देशन दिएको छैन । तत्काल पदबाट हटाउने योजनासमेत रहेको छैन,’ उनले भने ‘मुख्यमन्त्री राउतलाई पदबाट राजीनामा दिन निर्देशन दिएको भनेर बाहिर आएको हल्लामा कुनै सत्यता छैन ।

राउत यादवकै दल जसपाका नेता हुन । यता मुख्यमन्त्री राउतले पनि आफूलाई राजीनामा दिन कुनै निर्देशन नआएको जानकारी दिएका छन् । आज पत्रकारहरुसँगको छलफलमा उनले आफूलाई पार्टी अध्यक्षबाट राजीनामाका लागि निर्देशन नआएको बताएका हुन् । यद्यपी जसपा कार्यकारिणी समितिको पछिल्लो बैठकमा मधेस प्रदेशबाट प्रतिनिधित्व गर्ने केही प्रदेश सांसदले मुख्यमन्त्री राउतको राजीनामा मागेका थिए ।

बैठकमा त्यस विषयमा मौन रहेका पार्टी अध्यक्ष यादवले सोमबार भने राउतलाई राजीनामा गर्न निर्देशन दिएको खबर बाहिरिएको थियो । तर मंगलबार भने यादवले सो खबर सत्य नरहेको बताएका हुन् । जसपाको मधेस प्रदेश समितिको सोमबार जनकपुरमा बसेको बैठकमा पनि मुख्यमन्त्री राउतको राजीनामा मागिएको थियो । मुख्यमन्त्री राउत केही दिनयता काठमाडौंमै छन ।

अख्तियार दुरुपयोग अनुसन्धान आयोगले ‘बेटी पढाउ बेटी बचाउ’ अभियानअन्तर्गत मधेस प्रदेशका मुख्यमन्त्री लालबाबु राउतले वितरण गरेको साइकल खरिदमा अनियमितता भएको दाबी गर्दै विशेष अदालतमा मुद्दा दायर गरेको छ । उक्त मुद्दामा मुख्यमन्त्री राउतलाई चोख्याइएको टिप्पणी भइरहेकै बेला जसपाभित्रबाट राउतमाथि राजीनामाका लागि दबाब बढेको हो । खासमा मंसिरको चुनाव नजिकिदै जाँदा उपेन्द्र आफैंले पनि राउतलाई पन्छ्याउन खोजेको देखिन्छ । त्यसको प्रमुख कारण, सप्तरीमा आफू सुरक्षित बन्न नै हो ।

त्यसैले पर्साबाट प्रतिनिधित्व गर्ने मुख्यमन्त्री मोहम्मद लालबाबु राउतलाई फ्याँकेर आफ्नै जिल्लाका, अझ आफ्नै क्षेत्रका शैलेन्द्र साहलाई उनी केही महिनामात्रै भएपनि मुख्यमन्त्री बनाउन चाहन्छन् । साह अहिले मधेसका आर्थिक मामिलामन्त्री छन् ।

मधेस सरकार एक त भ्रष्टाचारका विषयमा मुछिनु, तथा हिन्दुत्वको वकालत गरिरहेको भारतीय जनता पार्टीको दबाबले गैर हिन्दु समुदायका राउत मुख्यमन्त्री रहिरहनु र आगामी चुनावमा भाजपाले चाहेजस्तै गेहरु बस्त्रधारण गरेका सीके राउतले चुनौती दिनुले उपेन्द्रको टाउको दुखाई बढेको विश्लेषण भइरहेका छन् । यद्यपी मधेस प्रदेशमा मुश्लिम समुदायको उल्लेख्य भोट उपेन्द्रले यसअघि पाउँदै आएका थिए । लालबाबुलाई हटाउँदा त्यो गुम्ने खतरा पनि उनले देखेका छन् । यहिसबका बीच उपेन्द्र कहिले मुख्यमन्त्रीलाई हटाउने त कहिले नहटाउने अभिब्यक्ति दिदै हिडेका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.