चितवन,भदौ ७
चितवनमा यो बर्षपनि स्क्रब टाइफसको संक्रमण भेटिएको छ । ४ सय ३१ जना बिरामीको गएको साउनमा नमूना परीक्षण गर्दा जिल्लामा ८२ जनामा स्क्रब टाइफसको संक्रमण भेटिएको जिल्ला जनस्वास्थ्य कार्यालय चितवनले जनाएको छ । मुसामा हुने किरा (माइट)को टोकाइबाट यो रोग लाग्ने गर्दछ ।
गत आर्थिक वर्ष २०७४∕७५ मा दुई हजार २ सय ३७ जनाको नमूना परीक्षण गर्दा ४ सय १० जनामा स्क्रब टाइफस भेटिएको थियो । साउनमा जिल्लामा ५ जनामा डेङ्गुको संक्रमण भेटिएको थियो । कार्यालयका कीट नियन्त्रक राम केसीका अनुसार ३ सय ४६ जनाको परीक्षण गरिएको थियो ।
डेङ्गु संक्रमित तीन जना चितवनका हुन् भने दुई जना बाहिरी जिल्लाका रहेका छन् । अघिल्लो आर्थिक वर्षमा ५९ जनामा डेङ्गुको संक्रमण भेटिएको थियो । डेङ्गु एडिस जातको लामखुट्टेको टोकाइबाट सर्ने एक प्रकारको सरुवा रोग हो । जिल्ला जनस्वास्थ्य कार्यालय चितवनले जिल्लामा स्वाइनफ्लूका बिरामी भने नरहेको दाबी गरेको छ ।
