Nepal Times
Nepal Times
3
Shares

जबराको महाअभियोग के हुन्छ ? सकियो बयान

जबराको महाअभियोग के हुन्छ ? सकियो बयान

२८ भदौ ,काठमाण्डौ ।

निलम्बित प्रधानन्यायाधीश चोलेन्द्र शमशेर जबराको महाअभियोग सिफारिस समितिमा बयान सकिएको छ । मंगलबार जबरालाई सोध्न बाँकी ८ वटा प्रश्न सोधेसँगै उनको बयान सकिएको हो । योसंगै जबराले आफूविरुद्ध लागेको महाभियोगबारे समितिले तयार पारेको सबै ४३ वटै प्रश्नको जवाफ दिएका छन् । चोलेन्द्रको बयान सकिएसँगै अब उनीबारे थप निर्णय लिन प्रतिनिधिसभाले गठन गरेको महाअभियोग सिफारिस समितिको बैठक बुधबार बिहान ९ बजे बस्ने भएको छ ।

कांग्रेस सांसद मीन विश्वकर्माका अनुसार भोलिको बैठकले चोलेन्द्रसँग पूरक प्रश्न सोध्ने नसोध्ने, प्रतिवेदन लेखनसहितका विषयमा निर्णय लिनेछ । बयानका क्रममा राणाले नाम लिएका व्यक्तिहरूलाई भोलि सिफारिस समितिले बोलाउने तयारी गरेको समिति सदस्य विश्वकर्माले बताएका छन् ।

समितिसँगको बयानमा चोलेन्द्रले प्रधानमन्त्री शेरबहादुर देउवा र माओवादी अध्यक्ष पुष्पकमल दाहालले राजीनामा दिन भन्दै दूतका रूपमा डिना उपाध्यायलाई पठाएको, नेपाल बार एसोसिएसनका तत्कालीन अध्यक्ष चण्डेश्वर श्रेष्ठले न्यायाधिश सिफारिसमा दबाब दिएकोसहित सर्वोच्च अदालतका न्यायधीशहरूको पनि नाम लिएका छन् ।

बयानका क्रममा जबराले आफू निर्दोष रहेको उल्लेख गर्दै प्रधानमन्त्री शेरबहादुर देउवा, गठबन्धनका नेता तथा सांसद, सहकर्मी न्यायाधीश, नेपाल बार र सर्वोच्च बारका पदाधिकारी, वरिष्ठ अधिवक्ता, पूर्वप्रधानन्यायाधीश र पूर्वन्यायाधीशहरूमाथि गम्भीर आरोप लगाएका छन् । जबरासँग गत भदौ १५ गतेदेखि बयान लिन सुरु गरिएकोमा मंगलबार बयान सकिएको हो ।

जबराले न्यायपालिकालाई आँच आउने गरी आफूले कुनै पनि काम नगरेको र आफूलाई महाअभियोग लगाउनुपर्ने कुनै पनि कारण नभएको दाबी गरिरहेका छन् । प्रतिनिधि सभाको कार्यकाल अन्त्य हुनै लाग्दा प्रतिनिधिसभाको महाभियोग सिफारिस समितिले राणामाथिको छानबिन प्रतिवेदन भदौ मसान्तसम्म बुझाउन लागेको हो ।

प्रधानन्यायाधीश राणाविरूद्ध २०७८ फागुन २१ गते सत्तारुढ गठबन्धनका ९७ सांसदले महाभियोगको प्रस्ताव दर्ता गराएका थिए। फागुन २२ गते प्रतिनिधि सभाले महाअभियोगबारे छानबिन गर्न ११ सदस्यीय समिति गठन गरेको थियो । राणाविरूद्ध दर्ता भएको महाभियोग प्रस्ताव छलफलका लागि २०७८ फागुन २९ गते प्रतिनिधि सभामा पेश भएको थियो । तर, त्यसको झन्डै ६ महिनापछि २०७९ साउन २२ गते मात्र महाभियोग सिफारिस समितिमा पठाएको थियो । गत १ फागुनमा सत्तारुढ दलका सांसदले जबराविरुद्ध महाअभियोग संसदमा दर्ता गरेका थिए ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.