१७ असोज, काठमाण्डौ ।
पूर्वप्रधानमन्त्री तथा नेपाल समाजवादी पार्टीका अध्यक्ष डा बाबुराम भट्टराईले नेपालको १० वर्षे लामो शसस्त्र युद्धबाट नेपालको राजनीतिमा स्थापित भएका नेता हुन् । उनी युद्धको जगकै बलमा देशको अर्थमन्त्री र प्रधानमन्त्री भईसकेका छन् ।
२०६४ सालदेखि २०७४ सम्म तीन निर्वाचनमा गृहजिल्ला गोरखाबाट जनप्रतिनिधि बनेका भट्टराईले अब भने सक्रिय राजनीतिबाट विश्राम लिने छनक देखाएका छन् । यसअघि संसदको सांसदभन्दा स्थानीय तहको मेयर जनताको काम गर्न अधिकारसम्पन्न रहेको भन्दै मेयरका लागि इच्छा राखेका उनले प्रधानमन्त्री, मन्त्री र सांसद भइसकेका नेताहरू स्थानीय तहको नेतृत्व गर्न हिचकिचाउन नहुने बताएका थिए ।
अहिले २०६४ यता गोरखा–२ बाट लगातार चुनाव लड्दै आएका बाबुरामले आगामी मंसिर ४ गते हुने निर्वाचनमा भने उम्मेदवार नबन्ने सार्वजनिक घोषणा गरेका हुन् । ‘२०६४, २०७० र २०७४ (साल) को संविधान सभा र प्रतिनिधि सभा निर्वाचनमा अत्यधिक मतले विजयी गराएर तपाईंहरूको सेवा गर्ने अवसर दिनुभएकोमा सम्पूर्ण गोरखाली बुबाआमा, दिदीबहिनी, दाज्यू भाइहरूमा अन्तःहृदयैदेखि आभार व्यक्त गर्दछु,’ सामाजिक सञ्जालमा एक सन्देश लेख्दै बाबुरामले भनेका छन्,
‘आगामी २०७९ मंसीर ४ को प्रतिनिध सभा निर्वाचनमा म उम्मेदवार नबन्ने यहाँहरू सबैलाई विनम्र जानकारी गराउन चाहन्छु।’ आगामी प्रदेश तथा प्रतिनिधि सभा निर्वाचनमा भट्टराई नेतृत्वको नेसपा र माओवादी केन्द्रबीच चुनावी तालमेल गर्ने सहमति भएको छ।
नेसपाका उम्मेदवारहरु माओवादी केन्द्रको चुनाव चिह्न (गोलाकार भित्रको हँसिया हथौडा) बाट चुनावमा उठ्ने पनि सहमति भएको छ। गोरखा २ बाट यसपटक माओवादी केन्द्रका अध्यक्ष पुष्पकमल दाहाल प्रचण्डले चुनाव लड्ने तयारी गरेका छन्।
प्रचण्डले बाबुरामसँगकै सल्लाहमा चितवन–३ छाडेर गोरखा–२ बाट चुनावी प्रतिस्पर्धामा उत्रिने तयारी गरेको सत्ता गठबन्धन र माओवादी केन्द्रका नेताहरुले बताउने गरेका छन्। चुनाव नउठ्ने घोषणा गरेको सामाजिक सञ्जालको सन्देशमा बाबुरामले गोरखाली जनताले आफूभन्दा पनि अझै सक्षम र जिम्मेवार व्यक्तिको नेतृत्व पाउने बताएका छन् ।
‘म सबै गोरखाली दिदीबहिनी दाजुभाइहरूलाई विश्वास दिलाउन चाहन्छु मेरो ठाउककमा तपाईंहरूले अझै सक्षम र जिम्मेवार व्यक्तिको नेतृत्व पाउनुहुनेछ र गोरखाको विकासको गतिले अझै तीब्रता पाउनेछ। म त्यहकका साथमा हुनेछु,’ बाबुरामले भनेका छन्।
उनको दल नेपाल समाजवादी पार्टीले भने नेकपा माओवादीको चुनाव चिन्हबाट चुनाव लड्ने निर्णय गरिसकेको छ । यसैले बाबुरामको नाम समानुपातिकको सूचीमा रहे नरहेको अहिले खुलिसकेको छैन् । यसपटकको निर्वाचनमा बाबुराम पुत्री मानुषी भने काठमाडौं ७ बाट उठ्ने तयारीमा छिन् ।
