१२ कात्तिक , एजेन्सी ।
फ्रेन्च क्लब पेरिस सेन्ट जर्मेन (पीएसजी) का फरवार्ड नेयमारमाथिको भ्रष्टाचार र ठगी आरोपको मुद्दा खारेज भएको छ । ब्राजिलियन फरवार्डलाई स्पेनिस क्लब बार्सिलोनामा अनुबन्ध हुँदा भ्रष्टाचार र ठगी गरेको आरोपमा मुद्दा चलाईएको थियो । नेयमारविरुद्ध २ वर्षको जेल सजाय र ८.४ मिलियन पाउण्ड जरिवानाको मागसहित मुद्दा दायर गरिएको थियो ।
नेयमारसँगै उनका बाबुआमा, बार्सिलोनाका पूर्व दुई अध्यक्ष जोसेप मारिया बार्टोमेउ र सान्ड्रो रोसेलविरुद्ध समेत मुद्दा दर्ता गरिएको थियो । तर, अभियोजकहरुले नेयमारविरुद्धको मुद्दा फिर्ता लिने घोषणा गरेका छन् । यससंगै पिएसजीका ब्राजिलियन स्टार नेयमारको संभावित जेल यात्रा रोकिएको छ ।
२०१३ मा ब्राजिलियन क्लब सान्तोसबाट बार्सिलोनामा अनुबन्धित हुँदा उनले वास्तविक ट्रान्सफर मूल्य लुकाएर भ्रष्टचार गरेको भन्दै उजुरी परेको थियो । नेयमार १४ मिलियन पाउण्डमा बार्सिलोनामा अनुबन्धित भएका थिए । तर, खुलाईएको रकम भन्दा बढीमा सम्झौता भएको आशंका गरिएको छ ।
उनीमाथि २ वर्षको जेल सजाय र ८.४ मिलियन पाउण्ड बिगो दावी गरिएको थियो । नेमारविरुद्ध मुद्दामा दुई हप्ता सुनुवाइ भएको थियो । जहाँ अभियोजनकर्ताले नेयमार विरुद्ध २ वर्षको जेल सजाय हुनुपर्ने माग गरेका थिए । आगामी महिना कतारमा हुने विश्वकप फुटबलमा ब्राजिलको कप्तानी गर्ने तयारीमा रहेका नेमारसँगै उनका बुबाआमा विरुद्धको पनि लामो जेल सजायको माग गरिएको थियो ।
तर दुई सातापछि मुद्दा फैसला हुने तय भएको अवस्थामा उनले भ्रष्टाचार गरेको भन्ने पर्याप्त प्रमाणको अभाव भएको भन्दै मुद्दा दायरकर्ता यु–टर्न हुँदै मुद्दा फिर्ता लिएका थिए । न्यायाधीशसमक्ष उनीहरूले अपराध गरेको पर्याप्त सबुत नभएका कारण मुद्दा फिर्ता लिने निर्णय गरेको बताएका थिए ।
यद्यपि यो मामिलाको अन्त भएको भनेर मान्न भने नसकिने जनाइएको छ । किनकि अभियोजनकर्ताले एक ब्राजिलियन खेलमा लगानी गर्दै आएको कम्पनीसँगको समन्वयमा संयुक्त उजुरी गरेका कारण कम्पनीले लाखौँ डलर नोक्सानीका लागि पुनः अदालत जान सक्ने संभावना रहेको जनाइएको छ ।
अदालतमा नेयमारले भने आफू निर्दोष रहेको बताउँदै आएका थिए । उनले आफ्नो ट्रान्सफरको सम्पूर्ण अधिकार बुबामा रहेको भन्दै आफूलाई जुन डकुमेन्टमा साइन गर्न भनियो त्यसमा मात्र गरेको बताएका थिए । अदालतमा बार्सिलोनाका पूर्व दुई अध्यक्ष जोसेप मारिया बार्टोमेउ र सान्ड्रो रोसेलविरुद्ध समेत मुद्दा दर्ता गरिएको थियो । नेयमार २०१७ मा बार्सिलोनाबाट पिएसजीमा आवद्ध भएका थिए ।
