Nepal Times
Nepal Times
3
Shares

फिफा विश्वकपः कस्तो छ पोर्चुगिज टिम ?

फिफा विश्वकपः कस्तो छ पोर्चुगिज टिम ?

१९ कात्तिक, एजेन्सी ।
फिफा विश्वकप कतार २०२२ सुरु हुन अब दुई साता मात्रै बाँकी छ । यो साता क्लबको खेलपछि खेलाडीहरु आफ्नो देशको प्रतिनिधित्व गर्दै विश्वकप खेल्ने योजनामा छन् । खेलाडीहरु आफ्नो देशलाई च्याम्पियन बनाउन चाहन्छन् । यता आफूलाई मनपर्ने चर्चित खेलाडीहरूलाई नजिकबाटै हेर्न पाउने भएका कारण समर्थकहरू पनि निकै उत्साहित बनेका छन् ।

विश्वकपमा चर्चित स्टार खेलाडीहरुले यस पटक पनि केही न केही नयाँ र छाप छाड्ने अपेक्षा आम समर्थकको रहेको छ । यस्ता चर्चित खेलाडीहरुको सूचीमा रहेको एक नाम हो क्रिस्टियानो रोनाल्डो ।

विश्वकप नजिकिदै गर्दा ३७ वर्षीय रोनाल्डोले पोर्चुगललाई विश्वकपको उपाधि दिलाएर आफ्ना फुटबल बुट भित्तामा झुन्ड्याउनेछन् वा उनको त्यो सपना अधुरै रहने हो भन्ने अधिकांशको चासोको विषय हो । पोर्चुगलले युईएफए नेसन्स लिग तथा युरोपियन च्याम्पियनसीपको उपाधि हात पारेपनि विश्वकप भने जित्न सकेको छैन ।

पोर्चुगल यस पटक भने रोनाल्डोसँगै ब्रुनो फर्नान्डेज, जोआव क्यान्सेलो, रुवेन डियाज तथा बर्नान्डो सिल्भाजस्ता खेलाडीमा समेत भर पर्नेछ । यस पटकको विश्वकपको समूह चरणमा पोर्चुगल फिफा वरियताको हिसाब अन्य टिमहरू घाना, उरुग्वे तथा दक्षिण कोरियाभन्दा माथि छ ।

समूह ‘एच’ मा रहेको पोर्चुगल सजिलै अर्को चरणमा प्रवेश गर्ने अपेक्षा भएपनि त्यसपछिको यात्रा भने पक्कै पनि सहज हुनेछैन । पोर्चुगलमा चर्चित खेलाडीहरू भएपनि उसले समूह चरणमै विभिन्न लिगका स्टार खेलाडीहरू सम्मिलित टिमहरूको सामना गर्नुपर्नेछ । पोर्चुगलले आफ्नो पहिलो खेल नोभेम्बर २४ मा घानाविरुद्ध खेल्नेछ ।

घानामा इंग्लिस प्रिमियर लिगका चर्चित खेलाडीहरू थोमस पार्टी र तारिक लाम्पटी रहेका छन् र दुवैजना उत्कृष्ट लयमा रहेका छन् । पोर्चुगलका लागि समूह चरणमा सबैभन्दा ठूलो चुनौती भने उरुग्वे हुनेछ । लुइस सुआरेज, डार्विन नुनेज जस्ता खेलाडीले पोर्चुगललाई चुनौती दिन सक्ने अपेक्षा गरिएको छ । उसका लागि अर्को चुनौती भनेको दक्षिण कोरिया हो ।

सन् २०१८ को विश्वकपमा जर्मनीलाई पराजित गर्दै समूह चरणबाट घर पठाएको दक्षिण कोरियालाई भने पोर्चुगलले कम भने आँक्ने छैन । अझ प्रिमियर लिग क्लब टोटेनहमका लागि सन् २०१५ देखि मुख्य खेलाडीको रुपमा रहेका सन हेउङ्ग–मिङ्गले खेलमा नाटकीय परिवर्तन ल्याउन सक्छन् ।

सनले सन् २०१५ देखि टोटेनहमका लागि ९६ गोलसमेत गरिसकेका छन् । यद्यपी च्याम्पियन्स लिगको समूह चरणको अन्तिम खेल दौरान ह्युङ मिङ सनले अनुहारमा चोट बोक्न पुग्दा उनले विश्वकप गुमाउने सम्भावना छ । उनको अनुहारमा चोट लागेकोले विशेष मास्क लगाएर खेल्ने सम्भावना पनि छ ।

पोर्चुगल दक्षिण कोरिया र उरुग्वेविरुद्धको खेलमा आफ्नो चार महत्वपूर्ण खेलाडीबाट वञ्चित हुन सक्नेछ । डिएगो जोटा, पेड्रो नेटो, पेपे र नुनो मेन्डेस चोटसंग संघर्ष गरिरहेका छन् । यस्तै समूह चरण पार गरे ब्राजिल, सर्विया, स्विट्ल्यान्ड वा क्यामेरुनको सामना गर्नेछ भने त्यसअघि स्पेन, जर्मनी वा बेल्जिमविरुद्ध खेल्नुपर्ने हुन सक्छ । क्वार्टरफाइनलभन्दा माथि पुगे इंग्ल्यान्ड, अर्जेन्टिना र फ्रान्सजस्ता टिम उसको बाटोमा आउने सम्भावना रहन सक्छ ।

तपाईंको प्रतिक्रिया

© copyright 2023 and all right reserved to Nepal Times | Design By : InDesign Media Pvt. Ltd.