४ मंसिर , काठमाण्डौ ।
जारी प्रतिनिधि तथा प्रदेशसभा निर्वाचन मयरहित र शान्तिपूर्ण बन्न सकेको छैन् । आज मध्यान्न सम्म देशभर ३५ राउन्ड हवाई फायर भएको छ । प्रहरी प्रधान कार्यालयका अनुसार रौतहटको गरुडा र कनकपुर मतदानस्थलमा तीन राउन्ड हवाई फायर भएको छ।
सिरहाको मिर्चैया बडहरामालमा ३ राउन्ड, चितवनमा एक राउन्ड, दोलखाको गुम्बेश्वरमा एक राउन्ड र हुम्लामा १८ राउन्ड हवाई फायर भएको प्रहरीका केन्द्रीय प्रवक्ता टेकप्रसाद राईले बताएका छन् । हुम्लाको देवकोटा आवि कुनापानीमा १७ राउन्ड र मान्धारा मावि भकुन्डामा १ राउन्ड हवाई फायर भएको छ।
यस्तै बाजुरामा ५ राउन्ड र डोटीमा ४ राउन्ड हवाई फायर भएको प्रहरी प्रधान कार्यालयले जनाएको छ । नेपाल प्रहरीका केन्द्रीय प्रवक्ता डीआईजी टेकप्रसाद राईका अनुसार रौतहट, सिराहा, चितवन, दोलखा र बाजुरामा गोली चलेको हो ।
मतदान रोक्ने प्रयास र झडपको स्थिति सृजना भएपछि प्रहरीले स्थिति नियन्त्रणमा लिनका लागि गोली चलाएको डीआईजी राईले बताए । उनका अनुसार देशभर २७ ठाउँमा मतदान स्थगित भएको छ । तीमध्ये कतिपय ठाउँको मतदान पुनः सुरु भइसकेको पनि राईले बताएका छन् ।
मध्यान्न पौने एक बजे सम्म ३२ प्रतिशत मात्रै मतदान भएको छ । विहान सुनसान जस्तै देखिएका मतदानस्थलहरु दिउसो भने केही भरिएको देखिएको विभिन्न जिल्लाबाट आएका समाचारहरुले देखाएका छन् । यसपटकको निर्वाचनमा मतदाताको उत्साह कम देखिएको अर्थशास्त्री समेत रहेका नेपाली काग्रेसका नेता स्वर्णिम वाग्लेले बताएका छन् ।
आफ्नो मताधिकार प्रयोग गरेपछि वाग्लेले लेखेका छन्, विगत ३१ वर्षदेखिका निर्वाचनहरुमा सहभागी वा चासो राख्दै आएको छु। यसपटक जनतामा निकै कम उत्साह देखियो। वितृष्णा छ। सोझो गठजोड भन्दा फरक नतिजा आउने आकलन। राजनीति सुधार्न वाध्य पार्ने नयाँ बिन्दुमा पुग्छौं कि?
