११ मंसिर, एजेन्सी।
चीनको शिनजियाङ्ग प्रान्तमा सरकारले लामो समयदेखि लकडाउन गरेको भन्दै स्थानीय जनताले सरकारविरुद्ध विरोध प्रर्दशन ब्यापक बनाएका छन् । कोरोना नियन्त्रण गर्न भन्दै यहाँ लगाइएको लकडाउनसहितका प्रतिवन्धका कारण चिनियाँ राष्ट्रपति सी जिनपिङमाथि पनि आक्रोश बढेको छ ।
प्रदर्शनकारीहरुले उनको राजीनामाकै माग गरेका छन् । गएको बिहीवार एउटा अपार्टमेन्टमा आगलागी हुँदा १० जनाको ज्यान गए पछि अहिले विरोध प्रदर्शन भइरहेको हो । विरोध प्रदर्शनमा रहेकाहरुले कोरोना महामारी विरुद्ध लगाएको कडा प्रतिबन्धका कारण आगलागीमा परेकाहरु बाहिर निस्कन नसकेका र उनीहरुको ज्यान गएको आरोप लगाएका छन् ।
चीनको उरुमचीमा कोराना रोकथामका लागि भन्दै लगाइएको कडा प्रतिबन्ध विरुद्ध नाराबाजी भइरहेको भइरहेको विभिन्न अन्तर्राष्ट्रिय संचारमाध्यमहरुले जनाएका छन् । उनीहरुले लकडाउन हटाउन माग गरेका छन् । चीनमा कडा प्रतिबन्धका बाबजुत पनि सङ्क्रमण फैलिएको छ ।
पहिलो पटक बुहानबाट देखिएको भाइरसको संक्रमण विश्वभर फैलिएपछि लकडाउनको कहर पनि विश्वभर देखियो । तर अन्ततिर क्रमिकरुपमा प्रतिबन्धहरु खुकुलो हुँदै हटाइएपनि ’जिरो कोभिड’ नीति लिएको चीनमा भने अहिलेसम्म यात्रा प्रतिबन्धहरु कायम छन् । यद्यपी अहिले विश्व कोरोना महामारीलाई बिर्सिँदै गर्दा चीनमा संक्रमण दर बढेको हो ।
तर, अहिले चीनको परिस्थिति पहिला झै छैन । यसपटकको प्रतिबन्धहरुको विरुद्धमा मानिसहरु आन्दोलित भएका छन् । चीनमा सरकारविरुद्ध प्रदर्शन बिरैले मात्र हुने गर्छ । तर, यसपटक भने प्रदर्शनकारीहरुले राष्ट्रपति सी जिनपिङकै राजीनामा मागेका छन् । प्रतिबन्धविरुद्धको प्रदर्शन हिंसात्मक हुँदै गइरहेको बताइएको छ ।
विरोधमा उत्रेका कयौं प्रदर्शनकारी पक्राउ गरेको अन्तर्राष्ट्रिय संचारमाध्यमहरुले उल्लेख गरेका छन् । प्रदर्शनमा केहीले ’सी जिनपिङ स्टेप डाउन’, ’कम्युनिष्ट पार्टी स्टेप डाउन’ लगायतका नारा लगाएका थिए ।
सरकार र चिनियाँ कम्युनिष्ट पार्टीको सिधा विरोध गर्न चीनमा मनाही छ । तर, अहिले यस्ता नाराहरु लाग्न थालेपछि प्रहरी चनाखो भएको बताइन्छ । चीनमै पहिलोपटक धेरै मानिसहरु भेला भएर सरकारविरुद्ध प्रदर्शन गरिरहेको प्रत्यक्षदर्शीहरुले बताएका छन् ।
