Nepal Times
Nepal Times
360
Shares

जनार्दनले खोलिदिए राष्ट्रपतिको नाम/ रामचन्द्र कि माधव ?

जनार्दनले खोलिदिए राष्ट्रपतिको नाम/ रामचन्द्र कि माधव  ?

७ पौष, काठमाण्डौ ।
नवनिर्वाचित सांसदहरुको समथग्रहण सम्पन्न भएसँगै दलहरुले नयाँ सरकार गठनलाई प्राथमिकताका साथ अघि बढाएका छन् । राष्ट्रपतिले सरकार गठनका लागि आह्वान गरिसकेको अवस्थामा अनौपचारिक रुपमा छलफललाई अघि बढाएका दलहरुले आजदेखि औपचारिक र घनिभूत रुपमा सरकार गठनको छलफललाई अघि बढाउने बताएका छन् ।

पहिले सरकार गठन हुने भएपनि अझै दुई महिना कार्यकाल बाँकी रहेको राष्ट्रपतिका लागि दलहरुले आफ्नो दावी अघि सारेका छन् । ठूलो दलका रुपमा काग्रेसले अहिलेकैै गठबन्धनलाई साथमा लिएर सरकार बनाउने तयारी गरेपछि प्याकेजमै सहमति गर्दा राष्ट्रपति को बन्ने भन्ने वहसले अहिले प्राथमिकता पाएको छ ।

राष्ट्रपतिको चर्चाका बीच नेकपा माओवादी केन्द्रका सांसद तथा अर्थमन्त्री जनार्दन शर्माले आगामी राष्ट्रपतिमा नेकपा एसका अध्यक्ष माधवकुमार नेपाल र कांग्रेस वरिष्ठ नेता रामचन्द्र पौडेल मध्ये एक बन्ने बताएका छन् । उनले आगामी सरकारको नेतृत्व पार्टी अध्यक्ष पुष्पकमल दाहाल ‘प्रचण्ड’ ले गर्ने दाबी गरेका छन्।

शपथ ग्रहणका संघीय संसद् भवन पुगेका अर्थमन्त्री शर्माले गठबन्धनले तोकेकै समयमा सरकार बनाउने बताए। उनले भने, ‘गठबन्धनमा छलफल भइरहेको छ। माधव कमरेड बिरामी भएर हस्पिटलमा हुनुहुन्छ। उहाँ डिस्चार्ज भएपछि गठबन्धनको बैठक बसेर निर्धारण हुन्छ। मैले मैले भन्दा पहिलो पटक अध्यक्ष प्रचण्ड नै प्रधानमन्त्री बन्नुहुन्छ। तर, निर्णय भएको छैन।’

उनले राष्ट्रपति राजनीतिक व्यक्ति हुने उल्लेख गर्दै बाहिर आएको चर्चाले अर्थ नराख्ने बताए। उनले आगामी राष्ट्रपति रामचन्द्र पौडेल वा माधव नेपालमध्ये एक हुने बताएका छन् । यता राष्ट्रपतिका लागि चर्चामा रहेका नेपाली कांग्रेसका वरिष्ठ नेता रामचन्द्र पौडेलले गठबन्धनकै सरकार बन्ने दाबी गरेका छन्। शपथका लागि संसद् भवन प्रवेश गर्ने क्रममा तपाईं राष्ट्रपति बन्न लाग्नुभएको हो ? भन्ने सञ्चारकर्मीहरूको प्रश्नमा उनले अब आफू संसदमा धेरै बस्ने बताएका छन् ।

गठबन्धनको सरकार बन्ने दाबी गर्दै पावर शेयरिङको विषयमा गठबन्धनमा छलफल नै हुन नपाएको उनले बताएका छन् । यस्तै राष्ट्रपतिका लागि चर्चामा रहेका नेकपा (एकीकृत समाजवादी)का अध्यक्ष माधवकुमार नेपालले आफू राष्ट्रपति बन्नका लागि योग्य उमेरमा पुगेको बताएका छन् ।

उनी आउँदो फागुन २६ गतेदेखि ७० वर्ष पूरा हुँदै छन् ।अध्यक्ष नेपालले यसअघि दुईपटक आफूले राष्ट्रपति पद अस्वीकार गरेको पनि बताए । संघीय संसद् भवनमा नवनिर्वाचित सांसदहरूको शपथग्रहणअघि बसेको सर्वदलीय बैठकमा सहभागी हुने क्रममा सञ्चारकर्मीसँग नेपालले यस्तो बताएका हुन् । “मलाई ०६४ सालमा पनि राष्ट्रपति बन्ने प्रस्ताव आएको थियो ।

०७२ सालमा संविधान जारी भएपछि पनि राष्ट्रपति बन्ने प्रस्ताव आएको थियो,” उनले भने, “त्यस बेला मैले उमेरका कारण म सक्रिय राजनीति गर्ने अवस्थामा छु भनेर अस्वीकार गरेको थिएँ ।” उनले अहिले दलका नेताहरूसँग राष्ट्रपति को बन्ने भन्ने विषयमा छलफल नभए पनि आफू उमेरका हिसाबले उपयुक्त समयमा रहेकोे आशय प्रकट गरेका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.