Nepal Times
Nepal Times
126
Shares

पशुपति क्षेत्रमा शिवरात्रीको तयारी कस्तो हुँदैछ ?

पशुपति क्षेत्रमा शिवरात्रीको तयारी कस्तो हुँदैछ ?

२ फागुन , काठमाण्डौ ।
यही फागुन ६ गते परेको महाशिवरात्री पर्वका लागि पशुपतिनाथ मन्दिर परिसरमा तयारी तिब्र पारिएको छ । मन्दिर परिसरमा रङ रोगनको काम धमाभम भइरहेको देख्न सकिन्छ । महाशिवरात्रीका लागि छिमेकी देशहरुबाट साधुसन्तहरुसमेत नेपाल आउने क्रम जारी रहेको छ ।

यसरी आउने साधुहरुलाई दान दक्षिणसहित बिदा गर्ने प्रचलन छ । शिवरात्रीका अवसरमा पशुपतिनाथको दर्शनका लागि स्वदेश तथा भारतका विभिन्न स्थानबाट समेत ठूलो संख्यामा भक्तजनहरु आउने गर्दछन् । शिवरात्रीकै अवसरमा पशुपति क्षेत्रमा विशेष मेलासमेत लाग्ने गर्दछ ।

उक्त मेलामा किनमेलका लागि विशेष बजारका अतिरिक्त बालबालिकाका लागि विभिन्न प्रकारका मनोरञ्जनात्मक खेलको व्यवस्थासमेत हुने गर्दछ । फागुन कृष्ण चतुर्दशीका दिन मनाइने यो पर्वमा शिवालयहरुमा भक्तजनको भीड लाग्ने गर्दछ ।

यस दिन शिवालयमा बेलपत्र चढाउने, उपवास र रात्रि जागरण गर्नाले पुण्य प्राप्त हुने धार्मिक विश्वास छ । पशुपति मन्दिरलाई यतिबेला बिजुलीका झिलीमिली बत्तीहरु, रङरोगन र फूलहरुले सजाउन थालिएको छ । शिवरात्रीको लागि पशुपतिका गेटहरु सजाउने कार्य जारी रहेको छ भने वरपरका क्षेत्रहरुमा सरसफाईको कार्य जारी रहेको देख्न सकिन्छ ।

महाशिवरात्रिका लागि पशुपति क्षेत्र सफा गर्न पशुपति क्षेत्र विकास कोषका सदस्य सचिव डा मिलनकुमार थापा आफैं लागि परेका छन्। संस्कृति पर्यटन एवं नागरिक उडड्यन मन्त्री सुदन किराँतीको विशेष पहलपछि कोषले शिवरात्रिलाई लक्षित गरी रंगरोगन, साजसज्जा र सफाईमा जोड दिएको छ।

पशुपति क्षेत्रमा भष्मेश्वर घाट, आर्यघाट, साधुसन्तका कुटी, विद्युतिय शवदाह गृह, सार्वजनिक शौचालय आदि चौबिसै घण्टा सञ्चालन हुने भएकाले पनि सरसफाईमा चुनौती रहँदै आएको छ । शिवरात्री नजिकिदै गर्दा भक्तजन र साधुसन्तको घुँईचो बढ्नाले थप चुनौति रहने देखिन्छ।

यस वर्षको महाशिवरात्री पर्वमा नेपाल, भारत, भुटान श्रीलंका लगायत अन्य राष्ट्रहरुबाट १० लाख सनातन धर्मावलम्बीहरु पशुपतिनाथको दर्शनार्थ आउने अनुमान गरिएको छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.