५ फागुन, एजेन्सी ।
कीर्तिपुरस्थित त्रिवि क्रिकेट मैदानमा जारी आईसीसी पुरुष क्रिकेट विश्वकप लिग–२ अन्तर्गतको खेलमा सट्टेबाजी गरेको आशंकामा एक नेपाली पक्राउ परेका छन् । लिग–२ अन्तर्गत नेपाल र स्कटल्यान्डबीच जारी खेलका क्रममा सट्टेबाजी गरेको आशंका लागेपछि एक जना नेपालीलाई पक्राउ गरिएको नेपाल प्रहरीको केन्द्रीय अनुसन्धान ब्यूरो (सीआइबी) का एसपी संजयसिंह थापाले जानकारी दिए ।
‘आजै जारी नेपाल र स्कटल्यान्डबीचको खेलका क्रममा सट्टेबाजी गरेको आरोपमा एकजनालाई पक्राउ गरेका छौं । थप अनुसन्धान जारी छ,’ उनले भने । यस्तै ‘अनलाइन बेटिङ’ गराएको आरोपमा काठमाडौँ प्रहरी र केन्द्रीय अनुसन्धान ब्युरोले अन्य ४ जना अभियुक्तहरुलाई कीर्तिपुर क्षेत्रबाट पक्राउ गरेको छ ।
स्कटल्याण्ड विरुद्धको खेलमा नेपालले टस जितेर फिल्डिङ रोजेको थियो । स्कटल्याण्डविरुद्ध नेपालले अहिले २७५ रनको लक्ष्य पछ्याइरहेको छ । स्कटल्याण्डका लागि माइकल लिस्कले शतक प्रहार गरेका छन् । आजको खेलमा नेपालका लागि सन्दीप लामिछानेले ३, कुशल मल्लले २, सोमपाल कामी, कुशल भुर्तेल र दीपेन्द्रसिंह ऐरीले १–१ विकेट लिएका छन् ।
पछिल्लो समय क्रिकेट खेलमा सट्टेबाजी र म्याच फिक्सिङका घटना बाहिरिएपछ प्रहरीले सुक्ष्मरुपमा निगरानी गरिरहेको छ । केही दिन अघि मात्र व्यूरोले नेपाल टी २० लिगका खेलहरुमा ‘स्पट फिक्सिङ’ घटनाको अनुसन्धान सकाएको छ । नेपाल प्रहरीको केन्द्रीय अनुसन्धान ब्युरो (सिआइबी)ले राय सहितको प्रतिवेदन सरकारी वकिल कार्यालया बुझाएको छ ।
मंगलबार ब्युरोले राय सहितको प्रतिवेदन बुझाएको थियो । १२ जनालाई प्रतिवादी बनाएर कारबाहीको माग गर्दै प्रतिवेदन प्रहरीले बुझाएको छ । घटनामा मुख्य अभियुक्त नेपाल टी २० लिगको मुख्य आयोजक सेभेनथ्री स्पोर्ट्सका प्रमुख जतिन अलुवालियालाई बनाइएको छ ।
