२१ फागुन, एजेन्सी ।
चीनमा आजदेखि राष्ट्रिय जनकंग्रेस (संसद)को अधिवेशन सुरु भएको छ । यो अधिवेशनबाट चीनको सरकारमा यो वर्ष ठूलो परिवर्तन हुँदैछ । यस अधिवेशनले राष्ट्रपतिमा सी चिनफिङको तेस्रो कार्यकाललाई अनुमोदन गर्नेछ । अधिवेशनले प्रधानमन्त्रीसहित सरकारका उच्च पदहरुमा व्यापक हेरफेर गर्नेछ ।
न्त्रिपरिषदसहित पार्टी र राज्यका अन्य संस्थाहरुमा नियुक्ति पाउने नेतातर्फ धेरैको ध्यान केन्द्रित छ । सी माओ चेतुङपछिको सबैभन्दा शक्तिशाली चिनियाँ नेता हुन् । कम्युनिस्ट पार्टीको गत अक्टोबरमा भएको महाधिवेशनबाट उनी अभूतपूर्व तेस्रो कार्यकालका लागि महासचिवमा चयन भएका थिए ।
प्रधानमन्त्री ली खछ्याङले अवकाश लिएका छन् । उनको ठाउँ ली चियाङले लिनेछन् । उनलाई महाधिवेशनले स्थायी समितिमा सीपछिको दोस्रो वरियतामा राखेको छ । चीनका प्रधानमन्त्री विश्वकै दोस्रो ठूलो अर्थतन्त्रका व्यवस्थापक पनि हुन् । सी चेचियाङ प्रान्तको पार्टी प्रमुख हुँदा २००४ मा ली उनको चिफ अफ स्टाफ थिए ।
अधिवेशनले चीनको यो वर्षको आर्थिक लक्ष्य पनि तय गर्नेछ । आर्थिक नीति हेर्ने जिम्मेवारीसहित हे लिफेङ उपप्रधानमन्त्री हुने चर्चा छ । मुलुकको अर्थतन्त्र र प्रविधि क्षेत्र हेर्ने तथा राष्ट्रिय सुरक्षा मामिला हेर्ने टोली पनि परिवर्तन हुँदैछ । शनिबार नै चीनको राजनीतिक सल्लाहकार समिति चाइनिज पिपुल्स पोलिटिकल कन्सलटेटिभ कन्फ्रेन्सको अधिवेशन सुरु भइसकेको छ ।
वार्षिक रुपमा हुने यी दुई अधिवेशनलाई दुई सत्र भन्ने गरिन्छ । गत अक्टोबरमा कम्युनिस्ट पार्टी कंग्रेसले देशको शक्तिशाली निकाय सात सदस्यीय पोलिटब्युरो स्थायी समिति नियुक्त ग¥यो जसमा सीका निकटस्थहरू मात्रै अटाएका छन् । अबको बैठकले धेरै वटा मन्त्रालय र विभागका प्रमुखहरूको हेरफेर गर्दैछ । त्यसमा पनि सी निकटहरू नै समावेश हुने ठानिएको छ ।
