Nepal Times
Nepal Times
3
Shares

गगनले रामचन्द्रलाई भने सडक खाली नगरी हिड्नु

गगनले रामचन्द्रलाई भने सडक खाली नगरी हिड्नु

२६ फागुन, काठमाण्डौ ।
नवनिर्वाचित राष्ट्रपति रामचन्द्र पौडेल राष्ट्रपति निर्वाचित भएको भोलिपल्टै आलोचनाको पात्र बनेका छन् । शुक्रबार आफ्नै बाचाविपरीत रामचन्द्र पौडेल सडक खाली गराएर पूजाअर्चनाका लागि पशुपति मन्दिर गएपछि सर्वसाधारणले उनको शैलीको आलोचना गरेका छन् ।

पौडेल बिहान ९ बजेतिर पुजाका लागि पशुपति पुगेका थिए। उनले त्यहाँ करिब डेढ घन्टा पूजा गरेका थिए। उनी पशुपति जाँदा र त्यहाँबाट निस्किँदा सडकको बायाँ लेन खाली गराइएको थियो। पशुपतिमा पूजा सकाएपछि करिब पौने ११ बजे त्यहाँबाट पौडेल सुन्दरीजल गएका छन्।

त्यहाँ उनले बीपी कोइरालाको सालिकमा माल्यार्पण गरेका छन् । पौडेलको सवारीका लागि एकातर्फको लेन खाली गराएपछि सडकमा ट्राफिक जाम भएको थियो। कार्यालय जाने समयमा जाममा फसेका सर्वसाधरणले हर्न बजाएर असन्तुष्टि जनाएका थिए।

राष्ट्रपति निर्वाचनमा पहिलो मत खसालेपछि पौडेलले बिहीबार संसद् भवनको ल्होत्से हलमा पत्रकारहरूसँग राष्ट्रपति निर्वाचित भएपछि आफूले सर्वसाधारणलाई सास्ती हुने गरी ट्राफिक जाम हुन नदिने बताएका थिए। उनले भनेका थिए, “म राष्ट्रपति बनेपछि शीतल निवासबाट बाहिर निस्कँदा जनताले सडक जामको सास्ती भोग्नुपर्दैन।”

तर त्यो वाचा विपरित भोलिपल्टै सडकमा पूरानै रुप देखिएको छ । यसअघि पहिलो राष्ट्रपति डा. रामवरण यादव र त्यसपछिकी राष्ट्रपति विद्यादेवी भण्डारीको कार्यकालमा शीतल निवासबाट हुने भीभीआईपी आवागमनका क्रममा सडक नै खाली गराउने गरिएको थियो ।

भण्डारीले केही साता अघि मात्रै संसदमा सम्बोधनका लागि आउने क्रममा सवारीको समयमा सडकमा हिडेको भन्दै वीर अस्पतालका चिकित्सक नै कुटिएका थिए । गएको माघ २७ गते राष्ट्रपति भण्डारी संघीय संसद्को संयुक्त अधिवेशनलाई सम्बोधन गर्न जाँदा उनको सवारी हुने सडकमा आवागमन ठप्प पारिएको थियो।यसैबीच नेपाली कांग्रेसका महामन्त्री गगन थापाले नवनिर्वाचित राष्ट्रपति रामचन्द्र पौडेललाई पाँचबुँदे सुझाव दिएका छन् ।

उनले सामाजिक सञ्जालमार्फत् थापाले सुझाव दिँदै भनेका छन् – विशिष्ट व्यक्तिको सवारी सुरक्षा दिने नाममा सडक खाली गराएर नागरिकलाई घण्टौँसम्म हिँडडुल गर्न नदिने शैली बदल्न विशिष्ट व्यक्तिको सुरक्षा कार्यविधि २०७७ लगायत विधि र प्रोटोकल परिमार्जनका लागि सरकारी निकायमा छलफल भइरहेको छ । तत्काल बदलेर सरल र नागरिकमैत्री अभ्यास गराउने दायित्व सरकारको हो । प्रारम्भदेखि नै सरकारले यसतर्फ ध्यान दिओस् । राष्ट्रपतिले म कुनै पार्टीमा थिएँ भनेर व्यवहार गर्नुहुने छैन ।”

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.