१३ चैत,काठमाण्डौ ।
काठमाडौं स्थित त्रिभुवन अन्तर्राष्ट्रिय विमानस्थलबाट टेकअफ लिन नसकेपछि बुद्ध एयरको विमान रनवेबाट फर्किएको छ । भैरहवाको लागि उडान भर्न तयार जहाज रनवेबाटै फर्किएको हो । सोमबार काठमाडौंबाट भैरहवाको लागि उड्न लागेको उडान नम्बर यू ८४५ को विमानले टेकअफ हुन नसकेपछि रनवेबाटै पार्किङमा फर्किएको हो ।
विमानको इन्डिकेटरमा समस्या आएपछि विमान रनवेबाट फर्काइएको त्रिभुवन अन्तर्राष्ट्रिय विमानस्थलका प्रवक्ता टेकनाथ सिटौलाले बताएका छन् । दिउँसो १ बजेर २० मिनेटमा उडान भर्नुपर्ने विमानले २ बजेर ५० मिनेटमा उड्नेक्रममा थियो ।
रनवेमा गुडेको विमान टेकअफ हुन नसकेपछि रनवेबाट फर्काइएको प्रवक्ता सिटौलाले जानकारी दिए । बुद्ध एयरका प्रवक्ता दिपेन्द्र कर्णले विमानमा प्राविधिक समस्या आएको बताएका छन् । यात्रुहरुलाई अर्काे विमानको व्यवस्था गरेर भैरहवा पठाइएको उनले बताएका छन् ।
एकसाता अघि मात्रै पनि सुर्खेत उडेको बुद्ध एयरलाइन्सको जहाज पुनः काठमाडौंमै अवतरण भएको थियो । शनिबार विहान ८ बजेर १३ मिनेटमा काठमाडौंबाट सुर्खेतका लागि उडेको जहाज निजगढको आकाशमाथि एक फन्को लगाएर पुनः काठमाडौंमा अवतरण गरेको थिया । यु ४१३३ जहाजको इन्डिकेटरमा समस्या आएपछि काठमाडौं फर्काइएको थियो ।
