२८ चैत ,एजेन्सी ।
रणनीतिक हिसाबले महत्वपूर्ण रहेका हरेक सानाठूला मुलुकको चियोचर्चा र सूचना संकलन गर्ने अमेरिकाको आफ्नै महत्वपूर्ण गुप्तचरका कागजातहरु लिक भएको छ । यसले अमेरिकी सरकारको होस उडाएको छ भने यो घटनाले विश्वभर पनि चर्चा पाइरहेको छ ।
किनभने ति लिक भएका डकुमेन्टमा आफ्ना विरोधीदेखि सहयोगीमाथि अमेरिकाले गर्ने जासुसी र युक्रेन–युद्धको महत्वपूर्ण विवरण समावेश थिए । साथै चीन र अमेरिकी सहयोगीहरूको बारेमा संवेदनशील जानकारी समावेश छ । अमेरिकाले अहिले यो कागजात कसरी चुहावट भयो भनेर स्रोतको खोजी गर्ने प्रयास थालेको छ ।
ट्विटरलगायतका अन्य सोसल मिडिया प्लेटफर्महरुमा सेयर भइरहेका यी कागजातहरुको चुहावटबारे छानबिन गर्न न्याय मन्त्रालयलाई आग्रह गरेको पेन्टागनले आइतबार जनाएको छ । यी कागजातहरू अमेरिकी सेनाको संयुक्त चिफ अफ स्टाफका अध्यक्ष एवं सेना प्रमुख जनरल मार्क ए मिली र अन्य वरिष्ठ सैन्य अधिकारीहरूका लागि उनीहरु समक्ष तयार पारिएको देखिएको अलजिजराले लेखेको छ ।
यसमा चार्ट, नक्सा र फोटोग्राफहरु समेत समावेश रहेको छ । यी कागजातमा युक्रेन, चीन, मध्यपूर्व र अफ्रिकासँग सम्बन्धित गुप्तचर जानकारी समावेश रहेको बतााइएको छ । यो लिकले वासिंगटनले युक्रेन, दक्षिण कोरिया र इजरायललगायतका आफ्ना नजिकका सहयोगीहरूमाथि जासुसी गरिरहेको विषयसमेत उजागर गरेको बताइएको छ ।
अमेरिकी राष्ट्रपति जो बाइडेन शासनका लागि यो लज्जास्पद कुरा हो । कागजातहरूले युकेन युद्धक्षेत्रमा भएको सैन्य क्षतिको विवरणमा क्षति कम देखाएको छ । बीबीसीले आफूले २० भन्दा बढी कागजातहरू हेरेको जनाएको छ । त्यसमा युक्रेनलाई उपलब्ध गराइएको प्रशिक्षण र उपकरणहरूको विस्तृत विवरणहरू रहेको छ ।
अमेरिकी अधिकारीहरूले रोयटर्ससँग यी कागजातहरू कहाँबाट लिक भएको भन्ने लुकाउन र अमेरिकी सुरक्षा हितलाई हानी पुर्याउने किसिमले फेरबदल गरिएको हुनसक्ने सम्भावना रहेको समेत बताएका छन् । युक्रेनी राष्ट्रपतिको कार्यालयले लिक कागजातहरूमा ठूलो मात्रामा काल्पनिक विवरण रहेको र रूसी भ्रामक सूचना प्रसारण अभियानको संकेत रहेको भनेको छ ।
गोप्य भनिएको फेब्रुअरी २३ को एक कागजपत्रमा अहिलकै दरमा भण्डारणको अवस्थाबाट गुज्रिने हो भने मे महिनासम्म युक्रेनी वायु रक्षा प्रणाली गोलाबारुदविहीन हुने विषय उल्लेख छ । यस्तै, एक अर्काे कागजतपत्रले इजरायलको मोसाद गुप्तचर एजेन्सीले इजरायली प्रधानमन्त्री बेन्जामिन नेतन्याहूको विवादास्पद कानुनी फेरबदलविरूद्ध विरोध प्रदर्शनलाई प्रोत्साहित गरेको उल्लेख गरेको छ ।
आइतबार नेतान्याहूको कार्यालयले यो विषय तथ्यहीन भएको भनेको छ । अर्को कागजातमा वरिष्ठ दक्षिण कोरियाली अधिकारीहरूले युक्रेनलाई हतियार आपूर्ति गर्ने अमेरिकी दबाबले लडाइँ गरिरहेका देशहरूलाई हतियार निर्यात नगर्ने सोलको नीतिको उल्लङ्घन भएको भनेको विषय उल्लेख छ ।
आइतबार दक्षिण कोरियाली राष्ट्रपति कार्यालयका एक अधिकारीले लिक भएका कागजातहरूको बारेमा रिपोर्टहरू स्वीकार गर्दै यो मुद्दा वासिंगटनसँग उठाउने बताएका छन् । कागजातहरुमा अमेरिकाले युद्धमा एक लाख ८९ हजार ५०० देखि दुई लाख २३ हजार रूसी सेना र एक लाख २४ हजार ५०० देखि एक लाख ३१ हजार युक्रेनी सैन्य क्षतिको विवरण उल्लेख गरेको छ ।
अमेरिकी रक्षा मन्त्रालयका गोप्य कागजातहरु लिक हुनुले राष्ट्रिय सुरक्षाको लागि धेरै गम्भीर जोखिम भएको पेन्टागनले जनाएको छ । पेन्टागन संयुक्त राज्य अमेरिकाको रक्षा मन्त्रालयको मुख्यालय भवन हो ।
