Nepal Times
Nepal Times
3
Shares

राजनीतिको स्वार्थ केन्द्र बन्दै कोशी अस्पताल

राजनीतिको स्वार्थ केन्द्र बन्दै कोशी अस्पताल

४ वैशाख , विराटनगर । कोशी प्रदेशको राजधानी विराटनगरस्थित प्रदेशकै ठूलो सरकारी स्वास्थ्य संस्था कोशी अस्पताल पछिल्लो समय राजनीतिक नेताको स्वार्थ पूरा गर्ने केन्द्र बन्दै आएको छ ।

केन्द्र सरकार र मन्त्री परिवर्तन हुने बित्तिकै कोशी अस्पतालका मेडिकल सुपरिटेन्डेन्ट (मेसु) परिवर्तन हुँदै आएका छन् ।

यही परिपाटीलाई कोशी अस्पताल विकास समितिका सदस्य मुकेश बुढाथोकीले प्रस्टयाइ दिएका छन् । उनले भर्खरै नियुक्त भएका अस्पतालका मेडिकल सुपरिटेन्डेन्ट (मेसु)लाई हटाउन फेरि चलखेल भइरहेको विषयलाई लक्षित गरेर सामाजिक सञ्जाल फेसबुकमा स्टाटस लेखेका छन् ।

मेसु परिवर्तन गर्न लागिएको भनेर बुढाथोकीले सामाजिक संजालमा सार्वजनिक गरेपछि उनको अभिब्यक्तिले अस्पतालमा राजनीतिक र व्यक्तिगत स्वार्थ हाबी गराउने प्रवृत्ति मौलाइरहेको विषयलाई उजागर गरेको छ।

यसले पछिल्लो फागुन २ गते निमित्त मेसुको जिम्मेवारी पाएका वरिष्ठ कन्सलटेन्ट सर्जन डा. रविनराज सिंहलाई कार्यकाल सुरु भएको २ महिनानै पूरा नहुदै हटाउने खेल सुरु भएको देखाएको छ ।

अस्पतालका कर्मचारी स्रोतले मेसु परिवर्तनमा मोरङबाटै मन्त्री बनेका सामान्य प्रशासन मन्त्री अमनलाल मोदी सक्रिय रहेको बताएको छ । विकास समितिका सदस्य बुढाथोकीले संघीय सरकार मातहतको अस्पताललाई सिध्याउन केही आकाशे मन्त्री सक्रिय रहेको भनेर स्टाटसमा लेखेका छन् ।

उनको स्टाटस पनि मन्त्री मोदीप्रति लक्षित रहेको बताइन्छ। उनले स्टाटसमा लेखेका छन्, ‘विराटनगरलाई सफा अनि राम्रो अस्पताल चाहिएको छ, । ‘सुधार र विकासको यात्रामा अगाडि बढेको अस्पताललाई सिध्याउन केही आकाशे मन्त्री लागि परेको कुरा सुनिँदै छ, खबरदार !’ यद्यपि मोदीको सचिवालयले भने यसको खण्डन गरेको छ ।

प्रदेशकै ठूलो सरकारी स्वास्थ्य संस्था भएर पनि राजनीतिक स्वार्थसँग जोडेर बारम्बार मेसु परिवर्तन गर्ने प्रक्रियाले अस्पतालको व्यवस्थापन र सेवा प्रवाहमा प्रत्यक्ष असर परेको स्वयम चिकित्सकहरु बताउँछन् । अस्पतालको अवस्था बुझ्न नपाउँदै मेसुलाई छोटो अवधिमै जिम्मेवारीमुक्त गर्ने क्रमले उनीहरुका नयाँ योजना र अस्पतालको व्यवस्थापनमा प्रत्यक्ष असर पुर्याउने गरेको छ ।

पछिल्लो १ वर्षभित्र मात्रै अस्पतालमा ३ जना मेसु फेरिएका छन्। वरिष्ठ हाडजोर्नी तथा नशा रोग विशेषज्ञ डा. यज्ञराज खरेललाई ०७८ फागुन ५ मा निमित्त मेसुको जिम्मेवारी दिइएको थियो भने उनलाई हटाएर भदौ १६ गते वरिष्ठ फिजिसियन डा. लक्ष्मीनारायण यादवलाई निमित्तको जिम्मेवारी दिइएको थियो । अहिले यादवलाई हटाएर डा. सिंहलाई निमित्तको जिम्मेवारी दिइएको छ ।

अस्पतालमा ११ औँ तहका २ जना चिकित्सक रहेपनि १० औँ तहका खरेल, यादव र सिंह मेसु बनेका छन् । २०६१ सालयता अस्पतालमा १७ जना मेसु परिवर्तन भइसकेका छन्। मेसुको परिवर्तन भने सरकार र मन्त्री परिवर्तनसँग प्रत्यक्ष जोडिदै आएका छन् । अस्थिर मेसुको विगतको नजिरले नै सरकार र मन्त्री परिवर्तन हुनासाथ यहाँका चिकित्सकहरुले पनि आफू मेसु बन्न लविङ गर्ने कर्मचारीहरु बताउँछन् ।

३ सय ५० बेड शैया रहेको अस्पतालमा दैनिक १ हजार ५ सय जनाभन्दा बढी उपचार र स्वास्थ्य परीक्षणका लागि आउने गरेका छन्। अस्पतालमा ७ अर्बको लगानीमा भौतिक संरचना निर्माणको काम भइरहेको छ । अस्पतालमा सरकारी दरबन्दीका ८० र विकास समितिका २५ चिकित्सक तथा सरकारी दरबन्दीका ७६ र समितिका ६५ स्टाफ नर्स कार्यरत छन्।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.