९ वैशाख, विराटनगर ।
नामको विषयलाई लिएर कोशी प्रदेश फेरि तनावग्रस्थ बनेको छ । पहिचान पक्षधरहरुले शनिबार विराटनगरमा प्रदेशको पुनः नामकरणको माग गर्दै आन्दोलन गरेका छन् । सो क्रममा आन्दोलनरत पक्ष र प्रहरीबीच झडप भएको छ । प्रदेशको नाम कोशी राखेको विरोधमा भइरहेको आन्दोलनका क्रममा ५ चैतमा घाइते भई १० चैतमा मृत्यु भएका पदम लिम्बुको शव श्रद्धाञ्जलीका लागि शनिबार धरानबाट विराटनगर ल्याइएको छ।
उनको अन्त्यष्टिअघि आयोजना गरिएको श्रद्धाञ्जलीसभामा झडप भएको हो । मुख्यमन्त्री तथा मन्त्रिपरिषद कार्यालय अगाडिको बाटोलाई निषेधित क्षेत्र तोकेर प्रहरीले आवतजावतमा रोक लगाएपछि भीड भड्किएको हो। आन्दोलनरत पक्षले निषेधित क्षेत्र तोडेपछि झडप भएको प्रहरीले बताएको छ ।
मुख्यमन्त्री कार्यालयदेखि २०० मिटर उत्तरमा पर्ने सडकमा झडप हुँदा प्रहरीले अश्रुग्यास र लाठी प्रहार गरेको छ ।झडपका क्रममा १० जना घाइते भएका छन् । नेपाल प्रहरीका तीन, सशस्त्र प्रहरीका तीन र अन्य आन्दोलनकारी गरी १० जना घाइते भएका छन् ।
घाइतेहरुको विराटनगरका विभिन्न अस्पतालमा उपचार भईरहेको प्रहरीले जनाएको छ। प्रहरीले भीडलाई तितरबितर गर्न ८१ सेल अश्रुग्यास प्रहार गरेको छ । आन्दोलनकारीले प्रहरीलाई लक्षित गरि पेट्रोल बम प्रहार गरेपछि प्रहरीले असुर अश्रु ग्यास प्रहार गरेको मोरङ प्रहरी प्रमुख दीपक पोखरेलले बताएका छन् ।
अहिले बजार क्षेत्रको स्थिति तनावग्रस्त बनेको छ । बेलबारीमा अन्त्यष्टि गर्नुअघि पदमको शवयात्रासँगै धरान, इटहरी र विराटनगरमा श्रद्धाञ्जली सभा आयोजना गरिएको थियो । सरकारले उनलाई सहिद घोषणा गरेपछि बल्ल आज उनको अन्त्येष्टी हुँदैछ । पहिचान पक्षधरले कोशी नाम खारेजको माग गर्दै गत चैत ५ गते विराटनगरमा गरेको बृहत् प्रदर्शनका क्रममा प्रहरी र आन्दोलनकारीबीच झडप भएको थियो ।
सोही झडपमा परी लाजेहाङको टाउकोमा चोट लागेको थियो । टाउकोमा चोट लागेका उनलाई चैत ८ गते धरानस्थित बीपी कोइराला स्वास्थ्य विज्ञान प्रतिष्ठानमा उपचारका लागि भर्ना गरिए पनि १० गते उनको मृत्यु भएको थियो । त्यसपछि प्रदेश पुनः नामकरण संयुक्त संघर्ष समितिले उनलाई सहिद घोषणा गर्नुपर्ने, उचित क्षतिपूर्ति दिनुपर्नेलगायत माग गरेका थिए ।
लाजेहाङलाई संघीय सरकारले सहिद घोषणा गर्ने र उनको परिवारलाई क्षतिपूर्ति दिने निर्णय गरिसकेको छ भने कोशी प्रदेश सरकारले पनि उनको परिवारलाई ३ लाख रुपैयाँ क्षतिपूर्ति दिने निर्णय गरिसकेको छ । तर संघर्ष समितिले प्रदेशको नाम कोशी खारेज नगरेसम्म शव उठाउन नदिने बताइरहेका थिए । विभिन्न पक्षको छलफलपछि एक महिनापछि लाजेहाङको अन्त्येष्टि गर्न उनीहरु सहमत भएका हुन् ।
