७ असार, काठमाण्डौ ।
४ दलीय समाजवादी मोर्चामा समाजवादीका सुत्रधार नेपाल समाजवादी पार्टीका अध्यक्ष तथा पूर्व प्रधानमन्त्री डा बाबुराम भट्टराईलाई जसपा अध्यक्ष उपेन्द्र यादवकै अनिइच्छाका कारण समावेश नगरिएको टिप्पणी भईरहेका बेला जनता समाजवादी पार्टी (जसपा)का अध्यक्ष उपेन्द्र यादवले बाबुराम भट्टराईको एक्लै हिँड्न बानी रहेका कारण समाजवादी मोर्चामा नआएको पनि ठिकै भएको बताएका छन्।
बिहीबार पार्टी कार्यालयमा आयोजित पत्रकार सम्मेलनमा अध्यक्ष यादवले समाजवादी मोर्चा निर्माण गर्ने विषयमा लामो समयदेखि छलफल चलेको तर छलफलमा एकदिन पनि बाबुराम भट्टराईलाई नदेखिएको बताएका हुन्।
मोर्चाले बाबुराम भट्टराईलाई छोडेको हो भन्ने प्रश्नमा उनले भने, ‘६÷७ महिनादेखि सघन रूपमा छलफल हुँदै आएको हो। उहाँको संलग्नता कहिल्यैपनि देखिएन। न हामीले उहाँलाई समातेको हो, न छोडेको हो। छुट्नुभएको हो भने उहाँलाई थाहा होला।’ यद्यपि यादवले बाबुरामका लागि बाटो राखिदिएको पनि बताएका छन्।
मोर्चाले लिएको अवधारणालाई समर्थन गर्ने र साथमा चल्ने हो भने हामीले त्यसका लाग बाटो राखिदिएका छौं,’ उनले भने, ‘बाबुरामजीको एक्लै हिँड्ने बानी छ। त्यसले गर्दा ठीकै भएको छ कि जस्तो पनि लाग्छ।’ यादवले मुलुकलाई अग्रगामी निकास दिने र अग्रगामी दिशातर्फ लैजाने प्रयासका साथ समाजवादी मोर्चा गठन भएको बताएका छन् ।
उनले विगतका कमी कमजोरीहरुलाई सच्याएर देखा परेका राष्ट्रिय मुद्दाहरुलाई सम्बोधन गर्दै मुलुकलाई सुशासन, स्थिरता, विकास र समृद्धिका लागि मोर्चा गठन भएको बताए । उनले आदिवासी, मधेसी मुद्दाहरु सम्बोधन गर्दै मुलुकलाई अग्रगामी निकास दिने लक्ष्य रहेको बताए ।
उनले समाजवादी मोर्चा गठन गर्दा आफ्नो अस्तित्व नै सकियो भन्ने किसिमका समाचारहरु आइरहेको भन्दै समाजवादी मोर्चाले आदिवासी, जनजाती, मधेसी र पहिचानवादीको मुद्दालाई झनै बलियो बनाएको बताए ।
यादवले सरकारले ल्याएको आगामी आर्थिक वर्षको बजेट गठबन्धनका दलहरुसँग छलफल नै नगरी ल्याइएकाले यथास्थितिमा बजेट पारित नहुने बताए । उनले सरकारले बजेट सच्याएर ल्याएपछि मात्रै बजेट संसदबाट पास हुने बताए ।
उनले आफ्नो पार्टी बजेटमा न्यायोचित वितरण भएन भन्ने पक्षमा रहेको बताए । उनले बजेट सच्याएर अघि बढ्ने सहमति भएको बताए । यसअघि सरकारलाई समर्थन जनाइरहेको जनमत पार्टीले पनि सरकारले बजेट नसच्याए सरकारलाई दिएको समर्थन फिर्ता लिने र बजेट पास हुन् नदिने बताइसकेको छ ।
यस्तै अर्काे सत्तारुढ दल नेकपा एसले पनि बजेट सच्याउनु पर्ने बताइसकेको छ । माओवादीले पार्टीगत धारणा नराखेपनि माओवादीका विभिन्न सांसदहरुले बजेटप्रति तीव्र असन्तुष्टि ब्यक्त आईरहेका छन् ।
समाजवादी मोर्चामा भएका दलहरु यसरी बजेट संशोधनमा अडिग भएपछि कांग्रेसबाट अर्थमन्त्री बनेका डा प्रकाशशरण महत दबाबमा परेका छन् ।
