१९ असार, एजेन्सी ।
भारतीय प्रधानमन्त्री नरेन्द्र मोदीको निवास सात लोक कल्याण मार्गमाथि ड्रोन जस्तै शंकास्पद वस्तु उडेको छ । समाचार एजेन्सी पीटीआईका अनुसार दिल्ली पुलिसले सोमबार बिहान ५ बजे एक फोन कल आएको थियो । पुलिसलाई प्रधानमन्त्री आवासमाथिको आकाशमा ड्रोन जस्तै केही वस्तु उडेको खबर आएपछि सतर्कता अपनाइएको थियो ।
समाचार एजेन्सी एएनआईका अनुसार उक्त वस्तु ड्रोन भएको पत्ता लागेपछि प्रधानमन्त्रीको सुरक्षा जिम्मा सम्हालिरहेको एसपीजीले दिल्ली पुलिससँग सम्पर्क गरेको थियो । पुलिसले उजुरी आएलगत्तै जब जाँच थाल्यो तब केही खुल्न सकेन। दिल्ली पुलिसका अधिकारीले यसबारेमा एयर ट्राफिक कन्ट्रोललाई पनि सोध्दा केही नखुलेको जनाएको छ ।
एएनआईका अनुसार दिल्ली पुलिसले यस मामिलामा जाँच गरिरहेको छ । दिल्ली प्रहरीले स्थानीय समयअनुसार बिहान साढे पाँच बजे मोदीको निवास माथिको नोफ्लाईङ जोनमा ड्रोन उडेको जनाएको छ । विशेष सुरक्षा समूह (एसपीजी)बाट पाएको उक्त जानकारीपछि अनुसन्धान सुरु भएको दिल्ली प्रहरीले बताएको छ ।
एसपीजी भारतीय प्रधानमन्त्रीको सुरक्षाका लागि जिम्मेवार सुरक्षा बल हो । दिल्ली प्रहरीले एक विज्ञप्तिमा जारी गर्दै भनेको छ, “प्रधानमन्त्रीको निवास नजिकै एक अज्ञात उड्ने वस्तुको बारेमा जानकारी प्राप्त भएको थियो। नजिकैका क्षेत्रमा व्यापक खोजी गरिएको थियो तर त्यस्तो कुनै वस्तु फेला परेन।”
प्रधानमन्त्री आवास उडान निषेधित क्षेत्रका रुपमा रहेको हुन्छ । यस क्षेत्रमा ड्रोन र हेलिकप्टरको उडान निषेध गरिएको हुन्छ । प्रधानमन्त्री आवास दिल्लीको लोक कल्याण मार्गमा छ । यो आवास १२ एकडमा फैलिएको छ ।
