१३ साउन, काठमाण्डौ ।
भारी वर्षाका कारण महाकाली नदीमा बाढी आएको छ । बाढीमापन केन्द्रका अनुसार जलसतह सतर्कता तह आसपास पुगेको छ । महाकाली नदीमा आज जलसतह सतर्कता तह आसपासमा रहने बाढी पूर्वानुमान महाशाखाले जनाएको छ । यसैबीच, कमला नदीका स–साना सहायक नदीहरूमा बहाव उल्लेख्य बढ्ने तथा केहीमा आकस्मिक बहावको जोखिम रहने पूर्वानुमान छ ।
विभिन्न प्रदेशमा भारी वर्षाको सम्भावना रहेकाले आज केही नदीमा आकस्मिक बाढीको जोखिम रहेकाले सतर्कता अपनाउन महाशाखाले आग्रह गरेको छ । आज कोसी, मधेस, वाग्मती, गण्डकी र लुम्बिनी प्रदेशका एकदुई स्थानमा मेघगर्जन र चट्याङसहित भारी वर्षाको सम्भावना रहेको छ । अहिले पनि पूर्वका कोशी र मधेस प्रदेशका केहि ठाउँमा पानी परिरहेको छ । अरु केहि पहाडी क्षेत्रमा पनि हल्कादेखि मध्यम वर्षाको सम्भावना छ ।
नेपालमा मनसुनी वायुको प्रभाव रहेको छ । मनसुनको न्यून चापीय रेखा सरदर स्थानको दक्षिणतिर छ । मौसमविद्का अनुसार मनसुनको न्यून चापीय रेखा दक्षिणतर्फ हुँदा भारतमा धेरै पानी पर्छ भने उत्तरतर्फ हुँदा नेपालमा पानी धेरै पर्छ । महाशाखाले वर्षाका कारण हुन सक्ने गेग्रान बहाव, बाढी, पहिरो तथा भू–क्षय जस्ता प्रकोपको जोखिम वा क्षतिबाट बच्न आवश्यक सतर्कता अपनाउन अनुरोध गरेको छ ।
