१४ साउन, एजेन्सी ।
नयाँ सिजन २०२३–२४ को पहिलो ‘एल क्लासिको’मा बार्सिलोनाले ३–० को जित निकालेको छ । शनिबार अमेरिकाको टेक्सासस्थित एटीएन्डटी रंगशालामा सम्पन्न प्रि–सिजनको पहिलो ‘एल क्लासिको’मा चिर प्रतिद्वन्द्वी रियल मड्रिडविरुद्ध जित दिलाउन बार्सिलोनाका ओस्मान डेम्बेले, फेर्मिन लोपेज र फेरान टोरेसले समान एक गोल गरे ।
खेलको १५औँ मिनेटमा डेम्बेलेले गोल गर्दै बार्सिलोनालाई अग्रता दिलाएका थिए । लोपेजले ८५औँ मिनेटमा गोल गर्दै बार्सिलोनालाई २–० को अग्रतामा राखेका थिए । इन्ज्युरी समयमा टोरेसले गोल गरेपछि बार्सिलोनाले ३–० को जित निश्चित गरेको थियो । त्यसअघि, २०औँ मिनेटमा प्राप्त पेनाल्टीलाई सदुपयोग गर्न नसक्दा रियालले गोलको सुनौलो अवसर खेर फाल्यो ।
बार्सिलोनाका रक्षक रोनाल्ड अराउहोले १८ यार्ड बक्सभित्र हातले बल छोएपछि रियालले पेनाल्टी पाएको थियो । तर, भिनिसियस जुनियरको प्रहार बारमा लागेर फर्कियो । पछिल्लो मैत्रीपूर्ण खेलमा बार्सिलोनाले लण्डन क्लब आर्सनलसँग ५–३ को हार ब्यहोरेको थियो भने रियल मड्रिडले म्यानचेस्टर युनाईटेडविरुद्ध २–० को जित दर्ता गरेको थियो । रियालको यो प्रि–सिजनको पहिलो हार हो ।
कार्लो एन्सेलोट्टीको टिमले यसअघि एसी मिलानविरुद्ध ३–२ र म्यानचेस्टर युनाइटेडविरुद्ध २–० को जित निकालेको थियो । अगष्टमा सुरु हुने ला लिगाको नयाँ सिजन अघि भएको मैत्रीपूर्ण एल–क्लासिकोमा बार्सिलोनाले सानदार जित आत्मसाथ गरेको छ । जाभी हर्नान्डेजको टिमले अब बुधबार इटालियन क्लब एसी मिलानविरुद्ध खेल्नेछ ।
