Nepal Times
Nepal Times
3
Shares

थुनामुक्त भएपछि सुनील शर्माले गरे ओली र प्रसाईँको प्रशंसा/फेरि मागे गृहमन्त्री र अर्थमन्त्रीको राजीनामा

थुनामुक्त भएपछि सुनील शर्माले गरे ओली र प्रसाईँको प्रशंसा/फेरि मागे गृहमन्त्री र अर्थमन्त्रीको राजीनामा

२७ साउन,काठमाण्डौ ।
नेपाली कांग्रेसका सांसद सुनील शर्माले राज्यसत्तामा टिकिरहन आफूलाई प्रधानमन्त्री र गृहमन्त्रीले पक्राउ गराएको आरोप लगाएका छन् । शुक्रबार काठमाडौं जिल्ला अदालतले थुनामुक्त गरी अनुसन्धान गर्न आदेश दिएसँगै रिहा भएका शर्माले सुन तस्करका संरक्षक स्वयम् गृहमन्त्री नारायणकाजी श्रेष्ठ र अर्थमन्त्री डा. प्रकाशशरण महत रहेको दाबी गरे ।

उनले आफूलाई ३० वर्ष पुरानो फाइल खोलेर तेस्रोपटक पक्राउ गरिएको पनि बताए । उनले आफूले आईएको शिक्षा भारतबाट लिएको र सो कुरा अदालतमा प्रमाणित गरेर देखाउने दाबी गरे । “सुन तस्करका संरक्षकहरू विशेषतः अहिलेको गृहमन्त्री र अर्थमन्त्री उहाँहरूले राजनीनामा दिनुपर्छ ।

मैले यो मागसहित अनशनको घोषणा गरेको थिएँ । राज्यसत्तामा टिकिरहनका लागि मलाई समातिएको हो ।“ उनले भने । आफूलाई प्रधानमन्त्री पुष्पकमल दाहालको निर्देशनमा पक्राउ गरिएको भन्दै उनले शान्ति सम्झौताका लागि वातावरण बनाइदिने आफूलाई प्रधानमन्त्री दाहालले हत्कडी लगाएर ’गुन तिरेको भन्दै कटाक्ष गरे ।

थुनामुक्त हुँदै गर्दा उनले केपी ओली जिन्दावादको नारा लगाएका थिए । शर्माले आफू हिरासतमा रहँदा नेकपा एमालेका अध्यक्ष केपी शर्मा ओलीले निर्वाह गरेको भूमिकाको प्रशंसा गरे । रिहा भएपछि सञ्चारकर्मीहरूसँगको कुराकानीका क्रममा उनले एमाले अध्यक्ष ओलीले आफ्नो पिताजीको जस्तै भूमिका निर्वाह गरेको बताए । साथै, उनले भिडिओमा उनले दिएको हौसला देखेर आफ्नो मन रोएको पनि बताएका छन् ।

‘मेरो पिताजीको जस्तै भूमिका निर्वाह गरिदिनु भएको राष्ट्र नायकका रुपमा उहाँले आफूलाई उभ्याउनु भएको छ केपी शर्मा ओली, उहाँका केही गुणहरु राम्रा छन् मैले पहिले पनि भनेको थिए उहाँ र उहाँको पाटीलाई धन्यवाद दिन चाहन्छु र म उहाँलाई भेट्छु पनि,’ उनले भने। देश बचाउने अभियानमा फरक पार्टीमा रहेर पनि लागिरहेको उनले बताए ।

सोक्रममा उनले अब कांग्रेसलै नेकपा (माओवादी केन्द्र) सँगको सहकार्य तोड्नुपर्ने बताए । “माओवादीसँगको अहिलेको हाम्रो एलाइन्समा सोच्नुपर्छ । यस्तो आतंककारी गृहमन्त्री एकछिन पनि सत्तामा बस्न मिल्दैन,“ उनले भने । यस्तै शर्माले व्यावसायी मीनबहादुर गुरुङ र कांग्रेस नेता बालकृष्ण खाँणले पनि बाहिरै बसेर मुद्दा लड्न पाउनुपर्ने पनि बताए ।

उनीहरू ’भगौडा’ नभएको उनको भनाइ छ । पत्रकारसँग कुरा गर्ने क्रममा शर्माले शेखर कोइराला, गगन थापासँगै केपी ओलीको नाम लिएर जिन्दावाद भने । देउवाको नाम भने लिएनन् । उनले आफूलाई साथ दिएकोमा दुर्गा प्रसाईँलाई विशेष धन्यवाद दिए ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.