१० भदौ, एजेन्सी ।
जिम्बाबेको राष्ट्रपतिमा एमर्सन मनाङ्गाग्वा दोस्रो कार्यकालका लागि निर्वाचित भएका छन् । कुल मतको ५२.६ प्रतिशत मत प्राप्त गरेपछि उनी दोस्रो कार्यकाल (५ वर्ष)का लागि पुनः निर्वाचित भएको जिम्बाबे निर्वाचन आयोग (जेडइसी) ले शनिवार घोषणा गरेको हो । जेडइसी अध्यक्ष प्रिसिला चिगुम्बाले अगस्ट २३—२४ को चुनावमा मनाङ्गाग्वाले अन्य १० जना राष्ट्रपतिका प्रतिद्वन्दीलाई पराजित गरेको बताए ।
मनाङ्गाग्वाका प्रमुख प्रतिष्पर्धी र विपक्षी सिटिजन्स फर कोएलिशन चेन्ज (सीसीसी) का नेता नेल्सन चामिसाले वैध मतको ४४ प्रतिशत मत प्राप्त गरेको चिगुम्बाले बताए । जिम्बाबेको कानूनअनुसार राष्ट्रपति हुनका लागि कुल वैध मतको ५० प्रतिशत मत प्राप्त गर्नुपर्छ । जिम्बाबेका जनताले बुधवार र बिहीवार नयाँ राष्ट्रपति, संसदका सदस्य र स्थानीय सरकारका प्रतिनिधि छान्न मतदान गरेका थिए ।
जेडइसीका अनुसार मनाङ्गाग्वाको सत्तारुढ जानुपीएफ पार्टीले संसदीय सिटको बहुमत हासिल गरेको छ । यसैबीच अफ्रिकन युनियन (एयु) र महाद्वीपका अन्य क्षेत्रीय निकायहरुले शुक्रवार शान्तिपूर्ण निर्वाचन सम्पन्न गरेकोमा जिम्बाबेको प्रशंसा गरेका छन् । यस हप्ताको आम निर्वाचनपछि एयु, पूर्वी र दक्षिण अप्रिmकाका लागि साझा बजाउर (कोमेसा) र दक्षिण अप्रिकी विकास समुदाय (एसएडिसी) का पर्यवेक्षकहरुले शान्तिपूर्ण निर्वाचन गर्न सफल भएकोमा प्रशंसा गरेका हुन् ।
त्यस्तै राष्ट्रमण्डल पर्यवेक्षक समूहकी अध्यक्ष अमिना मोहम्मदले चुनावको दिन शान्तिपूर्ण रुपमा निर्वाचन सम्पन्न भएकोमा प्रंशसा गरिन् । निर्वाचनमा महिला र युवाहरु बढी देखिएको बताइन् । उनले युवा र महिला बढी देखिनुले जिम्बाबेवासी आफ्नो आवाज स्वतन्त्र गर्न र देशमा चलिरहेको लोकतन्त्रमा योगदान गर्न इच्छुक रहेको प्रमाण भएको जनाएकी छिन् । ५ वर्षअघि ९४ वर्षीय तत्कालीन राष्ट्रपति रोबर्ट मुगाबेले पदबाट हटाएर तत्कालीन उपराष्ट्रपति मनांगाग्वा राष्ट्रपति बनेका थिए । यसबाट रुष्ट मुगाबेले आफ्नै पार्टी जानु पीएफका उम्मेदवार मनांगाग्वालाई चुनावमा नसघाएर विपक्षी उम्मेदवार चमिसालाई समर्थन गरेका थिए ।
