११ भदौ, विराटनगर ।
विराटनगर स्थित शिक्षादीप कलेजले अन्तर्राष्ट्रिय आणविक परीक्षण विरुद्धको दिवस कविता प्रतियोगिता गरी मनाएको छ । सो प्रतियोगितामा शान्तिकालागि निश्शस्त्रीकरण शीर्षकमा तीन दर्जन विद्यार्थीहरुले कविता वाचन गरेका थिए । उनीहरुको कविताको सन्देश आणविक हातहतियारका विपक्षमा थियो ।
उक्त कविता प्रतियोगितामा सिम्रिका तिमल्सेना प्रथम, एञ्जल राई द्वितीय र रितेश भट्टराई तृतीय भएका थिए । प्रतियोगीहरु आयुषा खातुन, सँस्कृति कर्ण, अनिषा कुमारी मण्डल र टोकनाथकुमार साहले सान्त्वना पुरस्कार प्राप्त गरे । विजयी कविहरुलाई कलेजका प्रिन्सिपल ज्ञानबहादुर खड्का, कोअर्डिनेटर नवीनकुमार राय, निर्देशक भूपेन्द्र दाहाल लगायतले नगद पुरस्कार र प्रमाणपत्र प्रदान गरेका थिए ।
साहित्यकार मीनकुमार नवोदित र प्राध्यापक डा. विमलकिशोर श्रीवास्तव सो प्रतियोगिताको निर्णायक थिए भने कलेजका सञ्चालक सदस्य रामचन्द्र अधिकारीले कार्यक्रम सञ्चालन गरेका थिए । प्रतियोगितामा सहभागी सबै विद्यार्थीहरुलाई प्रिन्सिपल खड्काले सहभागिताको लागि बधाई तथा धन्यवाद दिदै विद्यार्थीहरुको प्रतिभाको प्रष्फुटन नियमित रुपमा अतिरिक्त क्रियाकलापहरु कलेजले आयोजना गर्ने गरेको बताए ।
सन् २००९ मासंयुक्त राष्ट्र संघको महासभाले घोषणा गरेपछि हरेक वर्ष अगष्ट २९ तारिखमा आणविक हतियार विरुद्धको दिवस अधिकांश मुलुकहरुमा मनाउने गरिन्छ । आणविक परीक्षण र हतियारको शून्यताको संसार यो दिवसले परिकल्पना गरेको दिवसका अवसरमा संयुक्त राष्ट्र संघद्वारा विज्ञप्तिमा उल्लेख छ ।
