२१ भदौ,काठमाण्डौ ।
क्रिकेटर सन्दीप लामिछानेविरुद्ध काठमाडौं जिल्ला अदालतमा विचाराधीन बलात्कार सम्बन्धी मुद्दाको अन्तिम सुनुवाइका लागि बिहीबार न्यायाधीश शकुन्तला कार्कीको इजलासमा पेशी तोकिएको छ । यसअघि पटक–पटक अन्तिम फैसलाका पेसी तोकिए पनि फैसला नभइ सर्दै आएको मुद्दाको आज (बिहीबार)लाई पेसी तोकिएको थियो। सन्दीपको मुद्दामा यसअघि भदौ १० गते पेसी तोकिएकोमा हेर्न नभ्याउने हुँदै सरेको थियो।
भदौ १० गतेको पेसी सरेपछि सन्दीप एसिया कप क्रिकेट खेल्न पाकिस्तान गएका थिए। पाकिस्तान र श्रीलंकामा एसिया कप क्रिकेट खेलेर राष्ट्रिय क्रिकेट टोली नेपाल फर्किसकेको छ। भदौ १० गते अगाडि सन्दीपको मुद्दामा साउन ३२ गते (बिहीबार) सुनुवाइ भएको थियो।
उक्त दिन काठमाडौं जिल्ला अदालतका न्यायाधीश राजुकुमार खतिवडाको इजलासले पीडित किशोरी (गौशाला २६)की आमाको जन्ममिति प्रमाणीकरण गर्न आदेश दिएको थियो। पीडित किशोरीकी आमाको जन्ममिति एउटा कागजातमा २०३५ र अर्को कागजातमा २०३३ रहेको पाइएपछि अदालतले जन्ममिति प्रमाणीकरण गर्न भनेको हो।
न्यायाधीश खतिवडाको साउन ३२ गतेको इजलासले मुद्दाको नियमित सुनुवाइ गर्ने निर्णय समेत गरेको थियो। नेपाली राष्ट्रिय क्रिकेट टिमका पूर्वकप्तान समेत रहेका लामिछानेविरुद्ध गत कात्तिक १४ गते जिल्ला अदालत काठमाडौंमा जबरजस्ती करणीको मुद्दा दायर भएको थियो। सर्वोच्च अदालतले फास्ट ट्र्याकबाट मुद्दाको सुनुवाइ गर्न भनेपनि जिल्ला अदालत काठमाडौंमा पटकपटक मुद्दाको पेशी सर्दै आएको छ ।
आज न्यायाधीशले पन्छाएनन् भने अन्तिम बहस हुनेछ । अहिलेसम्म यो मुद्दा अन्तिम सुनुवाइ हुन तयार भएपछि पनि जिल्ला अदालत काठमाडौंका दश न्यायाधीशको इजलासमा घुमिसकेको छ । अन्तिम सुनुवाइमा पेसीमा चढ्न थालेको सात महिना पुगे पनि बहस सुन्ने र फैसला सुनाउने आँट न्यायाधीशहरूले गर्न सकेका छैनन् ।
कतिपय न्यायाधीशले समय हुँदाहुँदै पनि ’हेर्न नभ्याइने’ भनेका छन् त कतिपयले बहसै सुनिसकेपछि पनि ’हेर्न नभ्याइने’ भनेर पन्छाएका छन् । कतिपयले भने सरकारी वकिललाई स्थगित गर्न समेत लगाएका छन् ।
