१८ कार्तिक,विराटनगर ।
नेपालले आइसिसी टि२० विश्वकप २०२४ मा स्थान बनाएसँगै वरियतामा पनि सुधार गरेको छ । आइसिसीले जारी गरेको नयाँ टि२० आई वरियतामा नेपालले एक स्थान सुधार गर्दै १५ औं स्थानमा छ । टि२० विश्वकप एसिया क्षेत्र फाइनल छनोट अघि नेपाल १६ औं स्थानमा थियो । नेपालले विश्वकप छनोटमा चार मध्य तीन खेलमा जित हात पारेपछि वरियता पनि सुधार गरेको भएको हो ।
नेपालले नेदरल्यान्ड्सलाई पछि पार्दै एक स्थान सुधार गरेको हो । नेपाल २४ खेलमा ४ सय ३७७ अंक र १८२ रेटिङका साथ १५ औं स्थानमा छ । उता नेदरल्यान्ड्सको १९ खेलमा ३ हजार ४ सय ४५ अंक र १ सय ८१ रेटिङ अंक छ । नेदरल्यान्ड्सलाई एक रेटिङ अंकले पछि पार्दै सुधार गरेको हो ।
स्कटल्यान्ड १४ औं, आयरल्यान्ड १३ औं, नामिबिया १२ औं, जिम्बावे ११ औं र अफगानिस्तान १० औं स्थानमा छन् । भारत शीर्ष, इंग्ल्यान्ड दोस्रो, न्युजिल्यान्ड तेस्रो, अष्ट्रेलिया चौथो, पाकिस्तान पाँचौं, दक्षिण अफ्रिका छैटौं, वेस्टइन्डिज सातौं, श्रीलंका आठौं र बंगलादेश नवौं स्थानमा छन् । युएई १७ औं, ओमान १८ औं र पपुवा न्युगिनी १९ औं स्थानमा छन् ।
क्यामरुन सबैभन्दा पुछार ८७ औं स्थान छ । यसैबीच सरकारले विभिन्न समयमा भएका क्रिकेट प्रतियोगिताको पूर्वघोषित नगद पुरस्कार निकासा गरेको छ । तीन प्रतियोगिताको पूर्वघोषित एक करोड ५७ लाख ५० हजार नगद पुरस्कार निकासा भएको राष्ट्रिय खेलकुद परिषद्का सदस्य–सचिव टंकलाल घिसिङले जानकारी दिए ।
गत वैशाख ५ देखि १८ गतेसम्म भएको एसीसी पुरुष प्रिमियर कपका लागि ७९ लाख, २०७९ साल फागुन १२ देखि १८ गतेसम्म भएको आईसीसी यू–१९ पुरुष सीडब्लूसी–एसिया क्लालिफायरका लागि ४६ लाख र आईसीसी लिग–२ का लागि ३२ लाख ५० हजार नगद पुरस्कार निकासा भएको हो । सदस्य–सचिव घिसिङले पुरस्कार पाउने खेलाडीलगायतलाई बधाई दिँदै पुरस्कारका लागि प्रधानमन्त्री पुष्पकमल दाहाल ‘प्रचण्ड’ र युवा तथा खेलकुदमन्त्री डिगबहादुर लिम्बूलाई धन्यवाद दिएका छन् ।
साथै घिसिङले शुक्रबार मूलपानीमा भएको ट्वान्टी–२० विश्वकप छनोट एसिया क्षेत्रको सेमिफाइनलमा यूएईलाई आठ विकेटले हराउँदै अर्को वर्ष अमेरिका र वेस्ट इन्डिजमा हुने विश्वकपका लागि स्थान सुरक्षित गर्न सफल नेपाली टोलीलाई बधाई दिँदै फाइनलमा सफलताका लागि शुभकामना दिएका छन् ।
