२१ कार्तिक, काठमाण्डौ ।
धनुषाकी आरती साहको मृत्यु प्रकरणमा लामो समयदेखि न्यायका लागि उनका माइती पक्ष आन्दोलनरत रहेको अवस्थामा गृह मन्त्रालयले आन्दोलनरत आरती शाहका आफन्तलाई ५ महिनापछि वार्तामा बोलाएको छ । आरतीका बुवा विनोदप्रसाद साहलाई सम्बोधन गर्दै वार्ताका लागि प्रतिनिधि पठाउन गृहले पत्राचार गरेको छ ।
गत जेठ ७ गते धनुषामा आरती आफ्नै घरमा मृत भेटिएकी थिइन् । घटनामा उनका श्रीमान् र ससुरा पक्राउ परेपनि अनुसन्धान कमजोर गरिएको भन्दै आरतीका आफन्त निरन्तर आन्दोलनमा थिए । उनीहरूले धनुषा प्रहरी प्रमुख विश्वराज खड्कालाई जिम्मेवारीबाट हटाउनुपर्ने माग गर्दै आएका थिए । खड्कालाई प्रहरी प्रधान कार्यालयले हटाएपछि गृहले वार्ताका लागि बोलाएको हो ।
प्रहरी प्रधान कार्यालयले एसपी विश्वराज खड्कालाई धनुषा प्रहरी प्रमुखको जिम्मेवारीबाट हटाएको छ । खड्कालाई प्रहरी प्रधान कार्यालय तानिएको छ । आरती जेठ ७ गते आफ्नै घरमा मृत भेटिएकी थिइन् । यस प्रकरणमा पक्राउ परेका आरतीका श्रीमान् र ससुरा मुद्दा पुर्पक्षका लागि कारागार चलान भएका थिए । जनकपुरधाम उपमहानगरपालिका–९ थापाचोककी साह आफ्नै घरमा मृत भेटिएकी थिइन् ।
सो घटनामा प्रहरीले श्रीमान मोतीबाबु र ससुरा मदनमोहनलाई पक्राउ गरी अनुसन्धान गरिरहेको थियो । आरतीको माइती पक्षले मोतीबाबु र मदनमोहनविरुद्ध ज्यानसम्बन्धी मुद्दामा जाहेरी दिएको थियो । जिल्ला सरकारी वकिल कार्यालयले जिल्ला अदालतमा आरतीका श्रीमान र ससुराविरुद्ध १ असारमा ज्यानसम्बन्धी मुद्दा दर्ता गरेको थियो ।
३ असारदेखि भएको थुनछेक बहसपछि अदालतले उनीहरुलाई पुर्पक्षका लागि थुनामा पठाएको छ । दुई वर्षअघि मोतीबाबु र आरतीको विवाह सामाजिक परम्परा अनुसार भएको थियो । विवाहमा दाइजोसहित २५ लाख रुपैयाँ दिएको माइत पक्षको दाबी छ । पछिल्लो समय दाइजो कम भएको भन्दै घरमा आरतीलाई यातना दिँदै आएको माइती पक्षको आरोप छ ।
यही घटनामा सिंगो परिवारका सदस्यलाई बयानको लागि बोलाएर यातना दिएको दिएको भन्दै धनुषाका तत्कालीन प्रहरी प्रमुख (एसपी) खड्का र डीएसपीसहितका प्रहरीहरुविरुद्ध किटानी जाहेरी समेत परेको थियो । आफूहरुलाई प्रहरी कार्यालयमा कुटपिट तथा यातना दिएको भन्दै धनुषाको नगराइन नगरपालिका ८ खिरखिरियाकी २० वर्षीया मनिषा साहले हुलाकबाट जाहेरी पठाएकी थिइन ।
जाहेरी दिने मनिषा आरती साहकी बहिनी हुन् । पीडित परिवार जाहेरी दर्ता गराउन जिल्ला प्रहरी कार्यालय पुगेका थिए । त्यहाँ एसपी विश्वराज खड्काले प्रहरीमाथि कुटपिट र अन्याय गरी उल्टै आफूहरुलाई थप पीडा दिएकाले हुँदै नभएको घटनाको जाहेरी नलिने प्रतिक्रिया दिएका थिए ।
त्यसपछि आरतीका परिवार सरकारी वकिलको कार्यालय पुगेका थिए । त्यहाँ समेत जाहेरी नलिएपछि मनिषाले हुलाकबाट पठाएकी थिइन । जिल्लाबाट न्याय नपाएपछि माइत पक्षले प्रहरीमाथि कारबाही र छोरी आरतीको न्यायको माग गर्दै काठमाडौं पुगेर माइती घर मण्डलामा धर्ना दिँदै आएका थिए ।
