८ मंसिर,एजेन्सी ।
इजरायलले रणमैदान बनाएको गाजामा युद्धविराम र अतिवादी हमासले बन्धक बनाएकाहरुको रिहाइ आज शुरू हुने भएको छ । युद्धविरामको मध्यस्तकर्ता बनेको कतारको विदेश मन्त्रालयका प्रवक्ताले यस्तो जानकारी दिएका हुन् । ’युद्धविराम शुक्रबार बिहान ७ः०० बजेदेखि शुरू हुनेछ र नागरिक बन्धकहरूको पहिलो समूहलाई सोही दिन लगभग ४ः०० बजेसम्म सुम्पिइनेछ,’ प्रवक्ता माजेद अल–अन्सारीले उल्लेख गरेका छन् ।
शुरूमा १३ जनालाई रिहा गरिने छ, ती सबै महिला र बालबालिका एउटै परिवारका हुन् । प्रवक्ताका अनुसार प्रत्येक दिनमा चार दिनभित्र सहमति भएका जम्मा ५० जनालाई रिहाइ गरिने छ। हमासको नियन्त्रणमा नेपालका विपिन जोशी समेत रहेका छन् । युद्धविरामको सहमतिसँगै पहिलो ५० जनाभित्र उनको पनि रिहाइका लागि नेपाल सरकारले समेत पहल गरिरहेको परराष्ट्र मन्त्रालयले जनाएको छ ।
यद्यपि पहिलो चरणमा महिला र बालबालिकालाई प्राथमिकता दिएकाले उनी ५० जनामा पर्ने नपर्ने निश्चित देखिएको छैन् । गत अक्टोबर ७ देखि युद्धमा रहेका इजरायल र हमासले बुधबार चार दिने युद्धविरामको क्रममा कम्तिमा ५० बन्धक र सयौं प्यालेस्टिनी कैदीहरूलाई रिहा गर्ने सम्झौताको घोषणा गरेका थिए।
कतार, इजिप्ट र संयुक्त राज्य अमेरिकाद्वारा सहजीकरण गरिएको यो सम्झौता विस्तार र फराकिलो हुन सक्ने बताइएको छ । यो सम्झौता गाजामा रहेका २४ लाख जनतालाई सहायता प्रदान गर्ने उद्देश्यले पनि प्रेरित छ । इजरायली अधिकारीहरूले लगभग १ हजार २०० व्यक्तिहरू मारिएको र लगभग २४० जनालाई बन्धक बनाएको बताएका छन्।
यसअघि हमासले ४ जना बन्धकलाई रिहा गरेको थियो । गाजा पट्टीमा हमास सरकारका अनुसार त्यसबेलादेखि निरन्तर इजरायली बमबारी र भूमि आक्रमणले १४ हजारभन्दा बढी मानिसहरूको ज्यान गइसकेको छ । जसमा अधिकांश महिला र बालबालिका छन्। गाजापट्टीबाट एक महिनाको अवधिमा लाखौं मानिस विस्थापित भइसकेका छन् । आक्रमणका क्रममा इजरेली सेनाले हमासको सेल्टर बनेको अस्पताल मुनिका आधुनिक सुविधासहितका सुरुङहरु समेत ध्वस्त पारिदिएको छ ।
