२४ मंसिर,एजेन्सी ।
विश्व राजनीतिमा प्रमुख निर्णायक बन्दै आएका भारतीय प्रधानमन्त्री नरेन्द्र मोदी फेरि एक पटक विश्व नेताहरुको शीर्षस्थानमा पुगेका छन् । मर्निङ कन्सल्टले गरेको सर्वेक्षणका अनुसार, पीएम मोदी फेरि एक पटक विश्व नेताहरूमा शीर्षमा पुगेका हुन् । उनले ७६ प्रतिशतको अनुमोदन रेटिंग पाएका छन् ।
अमेरिकी कन्सल्टेन्सी फर्मको ‘ग्लोबल लिडर अप्रुभल रेटिङ ट्र्याकर’का अनुसार भारतका ७६ प्रतिशत जनताले मोदीको नेतृत्वलाई स्वीकार गर्छन् भने १८ प्रतिशतले उनको नेतृत्वलाई मन पराउँदैनन् । जबकि ६ प्रतिशतले यस विषयमा कुनै प्रतिक्रिया दिएका छैनन् । रेटिंगको मामिलामा प्रधानमन्त्री मोदीको नजिक कोही छैन ।
सर्वेक्षणमा मेक्सिकोका राष्ट्रपति एन्ड्रेस म्यानुएल लोपेज ओब्राडोर दोस्रो स्थानमा छन्, उनले ६६ प्रतिशत रेटिङ पाएका छन् । तेस्रो स्थानमा स्वीस राष्ट्रपति एलेन बेर्सेटले ५८ प्रतिशत रेटिङ पाएका छन् । यसअघिको सर्वेक्षणमा पनि प्रधानमन्त्री मोदी ग्लोबल रेटिङमा शीर्ष स्थानमा थिए भने अन्य ठूला विश्व नेताहरुको अनुमोदन रेटिङ निकै कम छ ।
जस्तो कि, अमेरिकी राष्ट्रपति जो बाइडेनको अप्रुभल रेटिङ ३७ प्रतिशत छ भने क्यानडाका प्रधानमन्त्री जस्टिन ट्रुडोले ३१ प्रतिशत र बेलायतका प्रधानमन्त्री ऋषि सुनकले २५ प्रतिशत पाएका छन् । फ्रान्सका राष्ट्रपति इमानुएल म्याक्रोनले सर्वेक्षणमा २४ प्रतिशत मात्र रेटिङ पाएका छन् ।
विशेष गरी हिन्दी भाषी राज्यहरू मध्य प्रदेश, राजस्थान र छत्तीसगढको विधानसभा चुनावमा भाजपाले ठूलो जित दर्ता गरेपछि प्रधानमन्त्री मोदीको शीर्ष रेटिङ अगाडि आएको छ । यसलाई २०२४ मा हुने आम चुनाव अघि प्रधानमन्त्री मोदी र उनको पार्टीको लागि ठूलो प्रोत्साहनको रूपमा हेरिएको छ ।
मोदी युक्रेन रुस युद्ध तथा इजरायल हमास युद्धमा पनि तटस्थ देखिदै आएका छन् । अमेरिकासहित पश्चिमाको प्रतिबन्ध र दबाबका बीच पनि मोदीले रुसी राष्ट्रपति भ्लादिमिर पुटिनसँगको सम्बन्ध अझ फराकिलो बनाएका छन् भने अमेरिकाको प्रत्यक्ष दबाबका बीच पनि रुसबाटै सस्तो मूल्यमा इन्धन खरिद गरेर बिक्री गरिरहेका छन् । भारत विश्वमा चौथो अर्थतन्त्र बन्ने तरखरमा रहेको छ ।
