२४ मंसिर, एजेन्सी ।
दक्षिण चीन सागरमा लगातार दोस्रो दिन फिलिपिन्स र चिनियाँ जहाजबीच टकरावको स्थिति देखिएको छ । अन्तर्राष्ट्रिय समाचार एजेन्सीहरुका अनुसार दक्षिण चीन सागरको विवादित जलक्षेत्रमा दुई देशका जहाजबीच तनावको अवस्था उत्पन्न भएको हो ।
तर यो तनावलाई लिएर दुई देशबीच आरोप–प्रत्यारोप भएको छ । चीनले यो घटनाको दोषी फिलिपिन्स भएको जनाएको छ । उता फिलिपिन्स तटरक्षक बलले चीनका जहाजले वाटर क्याननको प्रयोग गरिरहेको जनाएको छ ।
फिलिपिन्सले चिनियाँ जहाजले सेकेन्ड थोमस सोलनजिकै आफ्नो मालवाहक जहाजलाई ठक्कर दिने कोसिस गरेको आरोप लगाएको छ । चीनले भने फिलिपिन्समाथि आफ्नो एक जहाजमा ठक्कर दिन खोजेको आरोप लगाएको छ ।
शनिबार स्केरबोरो क्षेत्रमा चीन र फिलिपिन्सका जहाजबीच टकरावको घटना सार्वजनिक भएको थियो । दक्षिण चीन सागरमा चीन र उसका छिमेकी देशले आफ्नो–आफ्नो दाबी गर्दै आएका छन् । चीनले पूरै दक्षिण चीन सागर आफ्नो भएको दाबी गरिरहेको छ ।
तर फिलिपिन्ससमेत अन्य छिमेकी देशले भने यहाँ चीनले अन्तरराष्ट्रिय जल सन्धिको उल्लंघन गरिरहेको आरोप लगाएका छन् ।
