२६ मंसिर,काठमाण्डौ ।
नेपाली क्रिकेट टोलीका १० खेलाडी पाकिस्तान सुपर लिग २०२४ को ड्राफ्टमा परेका छन् । पाकिस्तान सुपर लिगले सोमबार सार्वजनिक गरेको ड्राफ्ट लिष्टमा विभिन्न क्याटेगोरीमा नेपाली रष्ट्रिय क्रिकेट टोलीका १० खेलाडी समावेश भएका छन् ।
जसमा सन्दीप लामिछाने, गुल्सन झा, आरिफ शेख, आसिफ शेख, अर्जुन साउद, देव खनाल, दीपेन्द्रसिंह ऐरी, कुशल भुर्तेल, कुशल मल्ल र सोमपाल कामी छन् । त्यसमध्ये सन्दीप प्लाटिनम र गुल्सन गोल्ड क्याटेगोरीको ड्राफ्टमा छन् । यस्तै बाँकी ८ खेलाडी सिल्भर क्याटेगोरीमा छन् ।
आगामी सिजनको पीएसएलको लागि ड्राप्ट आउने बुधबार डिसेम्बर १३ मा हुँदैछ । पीएसएल २०२४ फेब्रुअरी १३ देखि मार्च १८ सम्म हुनेछ । प्लाटिनम क्याटेगोरीमा रहेका खेलाडी कुनै टिममा अनुबन्ध भएमा १ लाख ४८ हजार अमेरिकी डलर पाउनेछन् ।
यस्तै गोल्ड क्याटेगोरीमा अनुबन्ध हुने खेलाडीले ३७ हजार ४३५ डलर तथा सिल्भर क्याटेगोरीमा अनुबन्ध हुने खेलाडीले १८ हजार अमेरिकी डलर पाउनेछन् । पाकिस्तान सुपर लिगको ड्राफ्टमा १० नेपाली क्रिकेटर अटाउँदा यता इन्डियन प्रिमियर लिगको अक्सनमा भने कुनै पनि नेपाली खेलाडी बिक्न सकेनन् ।
आइपीएलका लागि ७ नेपाली खेलाडीले आफ्नो नाम दर्ता गराएका थिए । पछिल्लो समय नेपालले अन्तर्राष्ट्रिय स्तरमा लगातार सफलता हात पारिरहेको र भारत र पाकिस्तान जस्ता टिमसँग एसिया कप, इमर्जिङ एसिया कप अनि एसियन गेम्समा भारतसँग खेल्दै उत्कृष्ट प्रदर्शन गरेकाले केही नामहरू अक्शनसम्म पुग्ने आँकलन गरिएको थियो ।
तर आइपिएलमा कुनै पनि खेलाडी अक्शनका लागि सर्ट लस्टसमेत हुन सकेनन् । यस्तो अवस्थामा पाकिस्तानी लिगका लागि अन्तिम ड्राफ्टमा नेपाली खेलाडीले स्थान बनाउन सके नेपाली खेलाडी र खेल क्षेत्र क्षेत्रमा थप उत्साह थपिने छ । नेपाली खेलाडीहरु अहिले आगामी वर्षमा हुने टि २० विश्वकपको तयारी गरिरहेका छन् ।
