१९ पुष,एजेन्सी।
अमेरिकाको न्यु जर्सीस्थित नेवार्क मस्जिद बाहिर एक इस्लाम धर्मगुरुको गोली हानी हत्या गरिएको छ । समाचार एजेन्सी रोयटर्सका अनुसार यस आक्रमणको मनसाय अहिलेसम्म खुल्न सकेको छैन । अहिलेसम्मको अनुसन्धानमा धर्मगुरु हसन सरिफमाथि पूर्वाग्रहबाट प्रेरित भएर वा आतंकवादको कोणबाट गोली प्रहार भएको संकेत नदेखिएको न्यु जर्सीका महान्यायाधिवक्ता म्याथ्यू प्लाटकिनले बताए ।
बुधबार एक पत्रकार सम्मेलनमा एसेक्स काउन्टीका वकिल थिओडोर स्टेफन्सले सरिफलाई मस्जिदबाहिर आफ्नो कारमा रहेका बेला बिहान ६ बजेतिर धेरैपटक गोली हानिएको थियो । घाइते सरिफलाई अस्पताल लगिएकोमा दिउँसो मृत घोषणा गरिएको थियो । न्यु जर्सीका धेरै मानिसहरू आजकल डरमा बाँचिरहेका महान्यायाधिवक्ता प्लाटकिनले बताएका छन् ।
अक्टोबर ७ मा इजरायलमा हमासको हमला र त्यसपछि इजरायलको कारबाहीपछि अमेरिकामा पनि इस्लामोफोबिकका घटना बढेको रोयटर्सले लेखेको छ । जसका कारण अमेरिकी सुरक्षा विभागले विभिन्न धर्म मान्ने मानिसहरूलाई सतर्क रहन आग्रह गरेको थियो ।
यसअघि अमेरिकी भूमिमा खालिस्तान समर्थक एकजना शिख पृथकतावादी नेतालाई मार्ने भारतको योजना असफल भएको दाबी गरेको थियो । अमेरिकी अधिकारीले शिख पृथकतावादी नेता गुरपतवन्त सिंह पन्नूलाई मार्ने भारतको योजना असफल बनाएको बताएका थिए । अमेरिकाले उक्त षड्यन्त्रको पछाडि भारतको हात रहेको आशंका गर्दै चेतावनी समेत दिएको थियो ।
